MP - Part 3

Peristiwa ke dua ani membabitkan seorang pelajar yang besigup. Masa belajar lagi tu ia besigup ah. Syabas. Kalau ku inda salah, kejadian ani berlaku lapas abis membuat satu paper qualifying exam kali. Lapas abis exam, sudah tentu kantin jadi destinasi pertama yang dituju. Namanya social centre kan. Alum batah lapas atu ke jamban tah ku sama si Haikal. Jamban yang sama dimana peristiwa pertama yang ku ceritakan dalam previous post atu berlaku.

Masa masuk atu macam biasalah, membuat apa yang sepatutnya. Bukannya kami kan besigup ah. Hahahaha.. Lapas atu becerita-cerita tah kami disana. Topik yang kami bincangkan masa atu mengenai dengan masalah disiplin di sekulah. Biasalah, dua-dua MP kan. Yang paling banyak kami suarakan pasal student besiguplah.

Di dalam jamban atu kamu tau kan ada satu pintu yang dalam nya ruang kusung. Iatah inda semena-mena ada student keluar dari sana. Bau sigupnya kuat. Aku memang tau student atu banyak masalah disiplin di sekulah. Namanya jangantah disabut. Kalau kamu yang tau atu jua, please jangan di sabut arah chat box ku atu. Aku inda mau memalukan siapa-siapa. Instead of keluar dari jamban atu ia mencuci tangan. Suspicious jua ku tu dengan baunya atu. Ku tanyalah bahapa ia di dalam atu, sementara si Haikal memeriksa di tempat student atu keluar tadi.

"Aku tau kamu mau minta nama kan?" balasnya dengan berlagak. Lain yang ku tanya, lain yang dijawabnya. Macam mengakun kesalahannya saja bunyinya ia ani.

"Mil fresh lakat tu bau sigup ah,"kata si Haikal lapas memeriksa tempat atu.

"Besigup kau kah dalam atu? Kau nada kelas kah?"tanya ku lagi.

Anak atu memang taiming dan berlagak. Inda ia menjawab. Mencuci mua ia pulang. Jadi aku minta lah namanya dan kelasnya. Di bagitaunya, tapi pendek nama yang dibaginya atu. Ketara bah menipu ah. Aku minta lah IC nya untuk memastikan (hahaha macam pulis tia pulang aku ah). Katanya IC nya tinggal. Ku Pajal lagi meminta full name nya. Kamu tau apa jawabnya?

"Nama niniku mau kamu jua?"atulah yang keluar dari mulutnya.

"Cali jua kau ani. Bah bulih eh, mun kau kan membagi mana saja,"balasku.

Batah eh kan meminta namanya ah. Caraku ku memajal atu dengan cara yang tegaslah tapi berhati-hati jua supaya aku inda provoke ia. Sebab aku tau student atu memang pekelahian. Tapi last-last mau ia jua membagi namanya dan kelasnya. Memang ia nada pilihan lain lagi pasal selagi ia inda membagi namanya banar selagi atu aku inda membanarkan ia keluar. Kalau ia inda keluar sudah tentu ia miss kelasnya.

Sebelum ia beredar aku sampat bertanya,"banar ni ah nama mu ah?"

"Kalau inda banar mengapa kan?"jawabnya berlagak sambil meninggalkan kami. Baie jawapannya ah. Tapi memang banar pulang nama yang dibaginya atu.

Setelah menerima nama atu, macam biasalah aku berjumpa dengan Cikgu Haiseh. Nya Cikgu Haiseh, student yang taiming atu andang balik-balik sudah kana tulis namanya di dalam buku pasal besigup. Bermasaalah banar anak atu. Aku hairan mengapatah durang ani besigup. Especially students. Mengapa tah jua durang terikut-ikut dengan habit yang bulih memendekkan umur ani. Kalau kan menghilangkan stress, pakailah cara lain yang inda memudaratkan kesihatan. Yang inda besigup atu, jangantah kamu memandai-mandai kan merasa besigup jua kalau inda mau mati awal. Yang sudah besigup atu, manasajatah kamu, asal kamu bahagia. Tapi mun besigup atu di tempat yang sesuai lah, jangan arah urang ramai.

Ok atu sajalah yang dapat ku kongsikan masa ku jadi MP. Masa ani sequel 007.5 masih dalam pembikinan. Kamu tunggu sajalah.

Posted in: