My Term Break Part 5

Sebelum aku sampat becakap apa-apa, si Nawawi pun keluar dari biliknya untuk menyambut jelama yang mengatuk pintunya. Sebagai langkah berjaga-jaga aku pun betapuk dalam luggage si Nawawi. Tapi inda muat, pasal badanku memang bukan dicipta untuk disimpan di dalam luggage. Kalau ku pajal masuk jua, alamat patahlah segala tulang-bendulang ku. Meskipun barangkali tulang ku kuat pasal banyak minum susu Nespray, tapi aku inda mau mengambil risiko. Baik tah betapuk arah tempat lain.

Dan akhirnya aku pun betapuk di bawah katil si Nawawi. Skill yang selalu dipakai ulih jelama-jelama yang ketakutan dan ketungkalan arah horror movies. Selalunya kalau arah movie mana kedapatan ni kalau betapuk bawah katil. Tapi akhirnya kedapatan jua pasal durang berasin tia, bekantut tia, batuk tia, tekirit tia apa. Ada-ada saja bah supaya membuatkan cerita atu betambah saspen.

"Eh, mana tia si Mil ani?"kata si Nawawi yang baru masuk semula ke biliknya.

"Uy, siapa tah mengatuk ah?"tanyaku sambil mengeluarkan kepala ku dibawah katilnya.

"Eh, kebeliangan ku kau ani ih! Bahapa kau betapuk di bawah katilku ani? Pikirku hantu movie jepun mana tadi kau ani!"

"Bah mana sajatah kau. Anubah, siapa tadi mengatuk ah?"

"Posmen mengirim surat!"

Owh si Awang posmen rupanya. Pikirku tah urang-urang yang menyerang rumahku tadi. Kebeliangan sudah hatiku. Syabas eh.

Kalau dipikirkan banar-banar ah, macam inda ku pecaya bah aku bulih terlibat dalam hal-hal yang bulih menerabangkan nyawaku ani. Macam belakon arah Action Movie saja. Aku pun teringat akan backpack yang dibagi ulih bini-bini eropah yang ku jumpai tadi. Antah apa kah barangnya dalam atu sampai sanggup betimbak-timbak ani bah. Rumahku jua yang jadi mangsa. Abis tah ku ni kalau kana suruh membayar ganti rugi rumahku yang abis pacah-memacah ceraminnya ah. Syabas sungguh.

"Uy, bahapa kau masih dibawah katil ku atu. Keluar tah,"ujar si Nawawi yang sadar aku masih berada dibawah katilnya.

Lalu aku pun keluar dari bawah katilnya. Dan apabila aku berdiri aku pun teliat bini-bini eropah yang ku jumpai tadi berdiri di siring si Nawawi.

"Mil, bini-bini ani kan jumpa kau. Sebenarnya bukan posmen yang mengatuk pintu ku tadi atu. Eksyenku saja,"kata si Nawawi.

Kebeliangan ku ih. Alum mati rupanya si manis ani. Pikir tah mati sudah pasal kana hujani peluru. Sementara ia masih hidup ani, aku pun mengemukakan beberapa soalan kepadanya yang dari tadi bemain-main di dalam benak fikiranku. Si Nawawi yang tadinya inda pecaya akan ceritaku, masa ani memerhatikan kami dengan penuh minat. Terutamanya arah bini-bini eropah yang cakap Brunei atu. Biasalah, bini-bini lawa. Siapa jua inda tepikat. Mun ada si Safwan sama si Hafiiz ni, antah eh. Abis bising rumah si Nawawi kali bila meliat si manis ani.

"Siapakan tadi yang menyerang kitani atu? Kau ani siapa? Namamu pun alum ku tau dari tadi. Berapa numbur telipun mu? Single masih?"satu demi satu soalan ku tanya arahnya.

"Ih, lain-lainan jua soalan mu ani ih. Aku masa ani single pulang masih yang banarnya,"balas bini-bini atu sambil bemain-main dengan rambutnya."Ok, nama pindikku Jem. Nama panjang Jem-balang!! Hahaha cali kan? Cali? Cali?"sambungnya lagi yang cuba membuat lawak inda seberapa laku.

Adidih pandai tia kan becali jua si manis ani.

"Diam jua. Bah, inda tah cali tu ertinya. Awubah, namaku Veronica. I work for a secret organisation. Urang yang menyerang kitani tadi atu, adalah another secret organisation yang ingin memusnahkan barang-barang dalam backpack atu. Kau pun tau kan, barang-barang dalam atu haram di UK. But then, tugas kami adalah untuk menyeludup dan mengulun urang lain supaya mengantar barang atu kepada urang yang mengordernya,"bini-bini atu berucap.

"Tapi apa barangnya dalam backpack ani? Dadah? Pistol? Badil-badilan? Talur panyu? kulit buaya?"tanya si Nawawi yang menyampuk bicaraku dengan si Veronica.

"Banar, kamu mau tau?"

Aku dan si Nawawi pun menganggukkan kepala kami.

Ok, bersambung lagi.. haha

Read More

Show-Off

Yatah urang paling show-off pernah ku jumpa kali ni. Taulah kau webmaster wang, inda jua payah kan show-off hahaha.

Namanya terpaksa kana censored. Ditakuti urang yang show-off ani kelurusan membaca blogku. Karang aku yang kana antam.

Pffftt... Show off!!! Awu deh kau webmaster tah haha

Haha jangan marah ah urang show-off =p

ps:Please wait for "My Term Break Part 5" which will be posted next year. Sanggup menunggu sampai next year? Haha nadadeh, tunggu saja the next few days. Stay Tune and please dont leave your seats. Hahaha macam TV saja =p Syabas sungguh!

Read More

My Term Break Part 4

Didalam cuaca yang sajuk membaku atu, aku berlari semahu-mahunya. Sudahtah bekaki ayam, makai boxer lagi tu. Baik jua ramai penghuni-penghuni di university masa atu banyak berambus sudah pasal balik kampung. Tapi inda pulang semua. Adalah seorang dua urang yang melintas sepanjang ku belusir atu. Membari malu eh. Nampak tia durang tubuhku yang sexy lagi memberahikan ani. Ada seorang atu sampat lagi merakam aku tu. Habis tah ku ni. Masuk youtube lah jawapannya. Cuba kamu search arah youtube. Ada kali tu di-postnya udah. Syabas sungguh.

Sambil menahan sajuk, belusir dan menahan malu, aku masih alum tau dimana kan kutuju ni. Mesti cari tempat selamat as soon as possible. Kalau ku stay di Park Wood saja, gerenti nyawaku terancam. Dan akhirnya aku memutuskan untuk menuju ke Darwin House arah rumah kawanku si Nawawi. Disana mungkin selamat sikit kali. Sikit pulang saja selamatnya tu.

Sementara aku belusir atu, aku menoleh balik-balik ke belakang. Mana tau kana uyung ulih urang-urang yang menyerang rumahku tadi. Tapi nasib baik jua nada. Maka aku pun meneruskan larian marathon ku.

5 minit kemudian aku pun sampai ke Darwin house. Sambil kekajaran lutut pasal kesajukan, aku pun mengatuk jendela si Nawawi sekuat-sekuatnya. Sikit lagi pacah bah jendelanya ah. Baik jua crack sikit-sikit ganya.

Inda batah atu kain jendelanya pun dibuka dan muncullah si Nawawi yang masih kusut-kusut usul muanya. Baru bangun tidur kali ni. Seakhir-akhir aku bangun, rupanya ia lagi akhir. Kemudian ia pun membuka jendelanya.

"Eh Mil, bahapa kau makai boxer ke rumah ku ani?"tanyanya sambil menggusuk kedua-dua matanya.

"Panjang ceritanya. Bah suruh tah aku masuk dulu. Mati kesajukan ku karang!"balasku sambil belumpat-lumpat pasal menahan sajuk.

So si Nawawi pun membuka pintu rumahnya dan aku pun tarus masuk. Finally, panas jua nah. Sikit lagi jadi macam Mr. Freeze tadi. Bila ku masuk biliknya, aku pun menyelongkar almarinya untuk mencari pakaian untuk dipakai. Suka hati bah aku ah. Inda lagi minta izin tu.

"Eh suka hati jua kau makai baju ku! Baju baru ku bali lagi kau pakai atu!"teriak si Nawawi.

"Inda apa, nanti ku membalikan kau yang baru lagi. Kes darurat ni!"jawabku.

Lapas atu aku pun menceritakan apa yang telah ku lalui sebentar tadi dari ku bangun tidur sampailah aku ke rumahnya. Dan apanah responnya?sudah mestilah ia inda pecaya. Siapa-siapa pun yang mendangar cerita ku ani gerenta inda pecaya.

"Astah banar. Inda kau nampak aku be-boxer ganya masa ke rumah mu ani?"aku cuba meyakinkan si Nawawi yang segala cerita ku atu bukan donggeng semata-mata.

"Macam banar ni eh. Dari movie mana kau tiru ceritamu ani? Hahaha,"ujarnya sambil mengetawakan aku.

Bila ku kan membidas balik cakapnya, tiba-tiba pintu rumahnya kana katuk. Baie. Jangan-jangan urang yang menyerang rumahku atu kali tadi yang mengatuk pintu atu.

Read More

My Term Break part 3

Sebelum meneruskan kata-katanya, bini-bini atu pun menunjukkan aku sebuah backpack berjenama Adidas hitam yang ampai-ampai di atas katilku. Eh, salah liat. Bukan Adidas, rupanya Adidud. Sikit lagi ku tertipu. Ciplak eh. Padantah stripenya sepuluh instead of tiga. Syabas sungguh.

"Nampak kau backpack ani?"tanyanya kepadaku.

"Of courselah aku nampak. Bemata jua ku ni,"balasku yang cuba becali.

"Oh, pandai becali kau ani rupanya. Bulih tahan cali mu atu ih. Kalah si Kudil."

Kurang asam. Sarcastic tu eh. Menyasal ku becali. Kemudian bini-bini atu pun menerangkan aku mengenai kandungan backpack atu. Rupa-rupanya isi backpack atu ialah beberapa packet barang-barang yang ditegah untuk dibawa masuk ke UK. Apa nya urang melayu, kira barang seludupan lah. Kalau dalam bahasa urang putih, smuggled goods. Kalau dalam bahasa Jepun inda tia ku tau.

"Errr... Sekalinya apa kena-mengena barang ani sama aku?"tanyaku yang dari tadi masih lagi betuala-tuala. Bila tah ku kan bebaju ni.

"Aku perlukan pertolonganmu untuk mengantar barang ani,"balasnya secara ringkas.

Apa eh. Banar kah inda ni si dayang ani. Adakah patut urang yang innocent macam aku ani disuruhnya mengantar smuggled goods. Baru jua bejumpa, minta tulung tia tarus. Syabas sungguh.

"Malas tah ku ingau. Aku datang ke mari kan belajar, bukan kan jadi penjenayah,"kataku yang me-reject pertolongannya.

"Lets say pistol ani tambus ke utakmu mu in the next 5 seconds. Mau kau menulung tu?"jawabnya sambil mengacukan pistol ke arah kepalaku.

"Jangan timbak!!! Aku virgin masih!!! Bah, bah aku tulung tah!!"teriakku dalam ketungkalan.

Bila mendangar teraisku atu, bini-bini atu pun menaruh balik pistolnya. Phew... Sikit lagi ku kembali kerahmatullah. Eh, baie bini-bini ani. Sudah kalah-kalahan, main pistol. Tepaksa tah ku mau menulung ia. Mun inda, melayang nyawaku tadi.

"Tapi mengapa misti aku kan? Banyak jua lagi urang lain di luar atu,"tanyaku yang inda puas hati pasal apa misti ku tulung ia.

Bini-bini atu terdiam sejenak pada mulanya. Lalu sambil mengurik telinga ia pun berkata, "Kau ani sebenarnya ada darah pahlawan. Kau saja yang inda tau. This is your destiny."

Wah, macam dialog movie saja. Macam banar ni cakapnya ah. Taielah. Macam tah aku inda tau yang ia ambil dialog atu dari movie.

Tiba-tiba aku tedangar beberapa das tembakan dari luar rumah dan dalam masa yang singkat tingkap ku tiba-tiba pacah lapas kana tambusi ulih peluru-peluru atu. Aku dan bini-bini atu secara automatic tunduk kebawah. Dan tanpa ku sedari tuala ku terlucut rupanya. Baik jua ku makai boxer, mun inda nampak "naindah" tu. Membari malu tu ah mun nampak.

"Shit, rupanya durang tau barang atu ada disini. Bah, baik tah kau lari selamatkan diri dulu. Biar aku handle durang ani!! Run!! NOW!!!"teriak bini-bini atu sambil menimbak-nimbak ke luar.

Aku pun berlari kan meninggalkan ia.

"Hoi, jangan lupa bawa backpack ah! Barang dalam ani inda bulih jatuh ke tangan durang! Bari barang ani arah Buajah Timah di London!!!"teriaknya lagi.

Sampat lagi bekurapak tu time-time cemani ani. Aku pun membawa backpack atu dan berlari meninggalkan rumah. Yang syabasnya aku keluar rumah ani memakai boxer ganya! Bekaki ayam lagi tu. Bayangkan waktu-waktu sajuk membaku cemani ani, kamu keluar rumah dalam separuh bogel. Sungguhpun sajuk, aku masih meneruskan larianku sambil menyikut sebuah backpack. Soalannya, kemana baik ku tuju ni?

Read More

My Term Break part 2

Tapi bila ku menjawab, di cancelnya tia callnya ah. Kurang asam punya urang. Baik jua masih free call. Mun inda, terabang credit tu. Syabas sungguh. So aku pun mengampaikan balik mobileku dan berjalan balik menuju ke shower room.

Sekali vibrate tia mobile ku ah. Ada new message ertinya tu. Untuk kedua kalinya, aku pun bejalan balik kan mengambil semula mobileku untuk membaca message yang baru sampai atu.

"Eh dari unknown number lagi,"kataku sambil membuka message yang baru sampai atu.

"Meet me at the Park Wood laundrette NOW. If you do not show up in 5 minutes, I'll come over to your room,"sepertimana yang terpapar arah screen mobile ku.

Siapa lagi kan ni. Urang salah message kali. So, aku pun ignore sajalah. Lapas atu berjalanlah ku semula ke shower room sambil bersiul-siul dan menggoyang-goyangkan pinggulku dengan bahagianya. Baik jua housemates ku banyak balik sudah. Mun inda nada ku be-ulah cemani ani.

Masa masuk ke shower room, teliat ku orang hensem dalam ceramin. Rupa-rupanya aku urang hensem atu. Pikir ku siapa tadi. Saspen eh. Aku pun mula melucutkan pakaianku satu demi satu dan kemudian melangkah masuk ke tempat shower. Aku pun menarik paip shower yang berada di dapanku. Maka air yang suam-suam panas pun mula mencurah-curah keluar dan membasahi tubuhku yang gebu.

"Lalalalala,"seperti biasa aku menyanyi dengan riang ria semasa mandi. Nyaman eh mandi panas-panas waktu sajuk-sajuk cemani ani.

Setelah 15 minit, akhirnya aku pun siap mandi. Badanku yang tadinya bebau hangit kini semerbak mewangi dengan bau-bauan tujuh kuntum bunga yang tumbuh di kawasan Bukit Shahbandar. Dengan bertuala-tuala aku pun berjalan balik semula ke bilikku. Bila ku membuka pintu bilikku, alangkah kebeliangan hatiku apabila meliat seorang bini-bini eropah (bulih tahan jualah lawanya) duduk di kerusiku sambil mengatik-ngatik laptopku dengan selambanya. Aii, bila ku membela perempuan simpanan ani?

"Excuse me miss..., "aku menagur bini-bini atu.

Bila mendangar suaraku atu, kebeliangan hatinya. Ulih kerana ia kebeliangan, tarus diacunya sepucuk pistol kearahku.

"Please dont shoot me!!! Im still a virgin!!"teriakku dalam ketungkalan.

"Oh kau rupanya. Membari tekajut saja kau ani,"katanya sebaik saja tenampak muaku. Eh, pandai cakap melayu lah urang putih ani.

Ia pun menaruh balik pistolnya dan mengarahkan aku untuk mengunci pintu.

"Do I know you?"tanyaku yang masih dalam kebingungan.

"Eh, kau ani. Cakap Brunei saja bah. Of courselah kau inda kenal aku. Tapi aku kenal kau. Oh by the way walaupun aku ani urang putih, tapi pandai cakap Brunei kali ah. Aku ani fasih dalam 1000 bahasa mun kau kan tau,"balasnya. Show-off jua ia ani eh. Aku apa jua ganya, mun ganya bilingual.

Dalam keadaanku yang masih betuala-tuala atu ia pun betanya pasal SMS yang dihantarnya tadi. Oh ia tah tu yang mengantar SMS atu. Pikirku urang salah message.

"Mana ada ku dapat. Bwoh, salah hantar kali ni,"jawabku eksen-eksen.

"Yakah? Bah inda apalah. Sebenarnya aku datang kesini ani ada hajat basar. Aku perlukan pertolonganmu."

Bersambung lagi...

Read More

My Term Break part 1

Suasana di bar pada malam atu inda riuh dan bising seperti selalu. Mungkin ramai students sudah balik kampung pasal university term break baru start. Aku pun mengaga ke arah bartender dan meng-order secawan teh tarik. Urang lain semua minum arak, aku ganya minum teh tarik. Ali-ali bah aku ah. Inda bulih minum arak. Haram hukumnya bah. Baik jua ada teh tarik di bar ani. Di bar lain mana tedapat ni teh tarik ah. Di Canterbury ganya ada ni.

"Can I have a "Pull Tea" please?"pintaku arah bartender atu.

"Sure, sir. Coming right up,"balasnya.

Sedang aku menunggu "Pull Tea" a.k.a "teh tarik" ku siap, tiba-tiba seorang gadis menghampiriku. Aku pun menoleh ke arahnya. What the... Jessica Biel?! Impossible. Bahapa ia ke Canterbury ani.

"Milzam, sebenarnya aku suka kau,"ujarnya. Eh, pandai cakap melayu rupanya Jessica Biel ani. Ia pun memegang leherku dan bibirnya semakin merapati bibirku.

Sekalinya aku pun terbangun. Ceh, mimpi rupanya. Talur. Sudah part yang siuk-siuk, tebangun tia ku. Kacau eh. Aku pun mengambil mobile sony ericssonku yang ku taruh disiring bantal untuk meliat jam. Rupanya pukul 12.17 tengahari sudah. Syabas sungguh. Baik jua cuti sudah, mun inda miss sudah lecture ni.

First thing yang ku buat lapas keluar dari katil of courselah switch on laptop. Lapas atu seperti biasa, check facebook dan check blog. Macamani tah kehidupan ku sehari-hari di uni ni time pagi-pagi. Sungguh boring dan kurang produktif.

Suasana di rumah ku sunyi sudah masa atu. Ketiga-tiga housematesku yang berdarah eropah sudah balik ke kampung masing-masing. So tinggallah aku dan seorang lagi housemateku di dalam rumah atu. Tapi kami pun bakal berambus dari rumah atu jua. Boring kali ah stay di rumah. The next Tuesday on 23/12/08, aku dan angkatan bala tentera 1st year Bruneian students di Kent
akan menuju ke London. Iski ku eh kan ke London ah. Inda sabar rasanya kan bejumpa kawan-kawan lama disana.

"Eh bau apakan ni?"tanyaku apabila tecium bau yang kurang menyenangkan. Aku pun mencari-cari dimana datangnya bau atu. Setelah panat lalah mencari, akhirnya bau atu pun kedapatan ulihku. Lahhh, aku rupanya yang bebau ani. Alum mandi bahhh. So, aku pun mengambil tuala ku dan berjalan menuju shower room yang berada di tingkat atas.

Alum jua ku sampat keluar dari bilikku, tiba-tiba mobileku ringing. Aku pun mengambil mobile ku untuk men-check siapa yang asi-asi menilipun ku time-time ku kan mandi atu.

"Eh, unknown number?"kataku dalam hati. Siapa lagi ni? Aku pun menjawab panggilan atu.

Seperti biasa, kalau part yang saspen atu, bersambung tia... hehe

Read More

Lovely Couple part 4

"Kau mau good news atau bad news dulu?"tanya kawanku.

Apa bisai ah. Good news atau bad news? Inda ku pandai milih eh. Payah bah soalan multiple choices ani. Yatah membagi banyak students hilang markah ni masa exam. Pasal inda tau mana satu kan dipilih. Last-last mun inda tau jawapannya, tepaksa main tam tam tut. Mun baik nasib, dapat markah. Mun salah jawapannya, markah talur lah yang kana bagi. Mun kana bagi talur ayam atau talur masin, baik jua. Ani talur kusung, useless banar.

"Bah good news tah dulu,"akhirnya aku membuat keputusan. Anitah kali pertama aku mengeluarkan suara setelah sekian lama membabaukan diri.

"Pilihan yang bijak my friend. Gerenti kau malar minum susu Nespray ni, sebab atu kau bijak bistari sampai Einstein pun kalah. Baiklah, good news nya ah... Waittt for ittt.. Waittt for ittt... Waittt for it.."

"APA good newsnya ani?!!"ujarku yang sudah hilang sabar pasal inda tahan menanti debaran. Iski banar jua udah tu aku ah.

"Eh rilek bah my friend. Aku atu saja-saja kan menyaspenkan kau dan para pembaca hehe. Ok good newsnya: si Nai kana dumped ulih si Joyah!"

Banar kah inda apa yang dicakapkannya ani. Ataupun hanya omong kosong semata-mata. Aku pun menyuruh ia mengulangi dialog yang diungkapkannya tadi sekali lagi. Tapi masih jua ku inda pecaya. Babal banar aku ani. Sudahnya becakap balik-balik sampai sejuta sembilan ratus ribu sembilan puluh sembilan sembilan ratus sembilan puluh sembilan a.k.a 1,999,999 kali, akhirnya aku pun pecaya. Aku pun apa lagi, celebrate the day lah. Bejoget "Jangan gila dong" tarus bah.

"Bad newsnya apa?"tanyaku kepada kawanku sambil menggoyang pinggulku mengikut rentak lagu "Jangan gila dong".

"Eh awuwah. Lupa ku membagitau. Si Joyah ada pengganti baru sudah. Ku dangar, penggantinya atu dari Belanda,"balas kawanku yang turut-turutan tia jua menggoyang pinggulnya.

Bila mendangar kata-katanya atu, beranti ku tarus bejoget. Apa ni?! Baru jua kan menikmati suasana. Spoil tarus mood ku bila mendangar bad news atu. Alum sampai lima minit bah aku happy ah. Bejoget pun alum abis. Kacau eh. Kan goyang gerudi sudah ku tadi. Ani nada tia mood ku nah.

"Adi..."tiba-tiba seseorang melagau namaku dari belakang. Aku pun menoleh. Rupa-rupanya si Nai.

Raut wajahnya menunjukkan frustation yang amat mendalam, sedalam Tasik Baikal di Russia. Nah, kau nah! Merasa tah kau tu apa yang ku rasa dulu. Tiwas saja kau mengambil si Joyah dari aku dulu.

"Mengapa kan manusia ani ah. Sudah dapat barang baru, inda tia lagi beguna barang yang lama. Kalau dulu si Joyah suka memakai aku, NIKE (Nai-ki), sekarang ani ia suka memakai baju bangsa Belanda namanya Von Dutch"rungut si Nai.

"Eh kau pikir ia suka makai kau saja kah. Dulu ia suka memakai aku jua, ADIDAS. Tapi sudah kau ada, kana simpan dalam almari tia ku saja,"aku membalas rungutannya.

Yatah cemani ni kehidupan kami sebagai BAJU BINI-BINI ni. Aku, Adi or nama panjangku ADIDAS dan si Nai or nama panjangnya Nai-ki a.k.a NIKE ingin meluahkan perasaan inda puas hati kami arah jelama-jelama di luar sana.
Please ah. Jangantah membali banyak-banyak baju baru bah, sampai kami yang baju lama ani inda bepakai unless kami ani inda muat arah badan kamu lagi. Kami ani sebagai BAJU sebenarnya ada perasaan jua bah. Yatah jaga hati kami ani.

The End

Read More

Lovely Couple part 3

Untuk memindikkan cerita, akhirnya aku pun ketemu si Nai. Tepaksa dipindikkan bah, kalau inda dipindikkan, takut cerita ani melarat sampai part 1000. Karang mengalih pulang si penulis menaip cerita ku ani. Membari kesian jua. Patah karang tulang jari-jemarinya pasal teluan banyak menaip.

Ok, berbalik semula kepada cerita ku tadi. Setelah sepurnama menunggu, akhirnya aku ketemu jua dengan si Nai. Kelurusan masa atu ia sorang-sorang. Macam-macam possibility sudah bemain-main di utakku ni bila kami start besemuka nanti. Bulih jadi perbincangan kami ani disudahi dengan pergaduhan. Sekiranya tah kami bekelaie karang, usulnya tepaksa tah ku keluarkan silat kura-kuraku yang ku warisi dari nini ku punya bapa punya abang punya mama punya ex-boyfriend punya adi punya abang ipar punya bini punya bapa. Panjang eh warisannya ani. Antah lurus kah inda tu. Aku sendiri pun paning yang banarnya.

"Hello brader. Bulih ku becakap sama kedikau?"tanyaku kepada si Nai secara tiba-tiba tanpa membagi salam. Kebeliangan ia tarus mendangar bah. Baik jua ia nada penyakit cardiac arrest.

"Oh bulih bulih. But please jangan panggil aku brader. Aku bukan brader mu. Panggil saja aku Nai. So, you must be Adi ey?"balasnya sambil tersenyum sinis. Eh, cemana ia tau namaku ani. Padahal alum pernah bejumpa. Aku pulang yang kebeliangan balik nah. Sikit lagi ku dapat cardiac arrest walaupun yang banarnya aku nada penyakit jantung.

"Since kau tau namaku. Aku rasa kau tau apa yang ku cakapkan arahmu."

"Of courselah aku tau. Kau bejumpa aku ani kan discuss hubungan ku dengan si Joyah kan? Yang banarnya nada pulang kan dibincangkan ni. Pasal She's mine already. Sorry lah."

What?! Aku kebeliangan lagi sekali mendangar kata-katanya yang membari sanak sampai inda mampu begarak. Segala langkah silat kura-kura ku pun inda lagi tekeluar.

Hari-hari yang berikutnya, aku hidup dalam frustation. Emo memanjang. Si Joyah pun jarang bejumpa aku lagi. Atu yang membuatkan aku lebih emo. Kan menangis inda belaing mata. Jangankan belaing, betaie pun inda mau. Menyasal ku inda propose ia awal-awal. Baie si Nai atu. Inda jua hensem banar. Hensem lagi ba*i prasanku. Ba*i bah ia atu. BA*I!!! Nah, start sudah swearing aku ah. Astaga... sabar... sabar...

Sejak ku emo ani, aku kurang becakap. Kalah urang babau. Kawan-kawanku pun sanak bila meliat sikapku yang inda lagi berapa ceria ani. Macam kan menempiling kediaku pulang durang atu bila meliat aku cemani ani. Tapi takut jua durang. Pasal durang tau aku pandai silat kura-kura. Jangan kamu. Walaupun namanya kura-kura, tapi kuat. Siapa-siapa yang mewarisi silat kura-kura ani, kalau melastik badan urang pakai jari, bulih jua ia lumpuh seumur hiduplah.

"Adi, aku ada good news and bad news untukmu!"tiba-tiba kawanku datang beterais arahku sedang aku siuk-siuk mengurik idung. Kebeliangan ku ulihnya bah. Baik jua inda temasuk seluruh jariku ani jauh-jauh ke dalam lubang idung. Apa kah lagi berita-berita terkini yang kan dibawanya ani.

Nah besambung tia! Saspen sudah...

Read More

Lovely Couple part 2

Hubunganku dengan si Joyah memang erat. Hubungan kami ani bulihlah diumpamakan bagai ambuyat dengan cacahnya. Kalau nada cacah, mana nyaman tu ambuyat ah. Since kami ani erat, kalau kemana-mana mesti kami ani sama-sama. Kecuali masa ke jamban & tidur lah. Indakan atupun kan sama-sama. Apalah kamu ani.

Asal saja hangout sama kawan-kawannya yang bini-bini gerenti ketampanan ku kana puji. Aku pun apalagi. Malu-malu babi lah. Babi pandai malukah? Antah eh. Pandai-pandai tah kamu memikirkan cemana usul babi kalau ia malu. Yatah payah jadi urang hensem ani. Malar kana puji bah. Si Joyah senyum-senyum dan tekidum manja sajalah bila mendangar aku kana puji.

Bukan pulang ku kan kambang ah, sepanjang kami couple ani inda pernah sekali pun kami bekelaie. Bertengkar lidah pun inda pernah. Bertengkar lidah as in debating, bukannya French kiss ah. Bukannya apa tu aku explain arah kamu atu. Takut kamu-kamu yang inda tau peribahasa salah paham bah.

Kirakan kami ani lovely and perfect couple lah. We are meant for each other. Inda kamu jealous tu? Apa? Inda kamu jealous? Eksennnn. Yang banarnya kamu jealous tu.

Tapi hubungan kami mula berubah semenjak dua-tiga hari yang lapas bila kawanku teliat si Joyah balik dari Mall Gadong dengan laki-laki lain.

"Adi usulnya kau ada saingan masa ani,"kata kawanku sambil mengurik hidungnya.

"Tu lubang hidung sebalah kirimu betaie ah,"balasku. "By the way apa maksudmu aku ada saingan ani?"sambungku lagi.

"Tadi teliat ku si Joyah sama laki-laki lain. Baik tah kau propose si Joyah atu lakas-lakas"

Eh, kacau eh kawanku ani. Kedapatan tia aku alum couple sama si Joyah. Eh mulutnya ani tah banar. Rasa kan ku staple. Ok, since kedapatan udah baik tah ku membagitau perkara yang sebenarnya. Yang banarnya aku & si Joyah alum lagi couple pasal aku alum propose ia untuk jadi girlfriend ku. Aku eksyen-eksyen saja. Tapi hubungan kami memang rapat macam couple. Harap-harap para pembaca jangan mengantam aku pasal aku eksyen arah kamu. Kalau kan mengantam jua, antam saja penulis cerita ani.

Pada hari-hari yang berikutnya, si Joyah inda membawa aku jalan-jalan. Ani membuatkan aku musykil. Selalunya aku bejalan sama ia at least once a week. Tapi ani nada bah. Usulnya apa yang dikatakan ulih kawanku masa atu memang banar. Tapi sebelum aku cemburu membabi buta, aku mengarahkan kawan-kawanku yang lain untuk spy si Joyah secara teliti. Just to make sure apa yang dikatakan ulih kawanku yang suka kurik hidung atu banar.

Selang beberapa hari aku pun hangout dengan kawan-kawanku untuk mengurik maklumat dari durang.

"Sorry to tell you this adi. Hasil dari investigation kami, andang banar si Joyah masa ani sama laki-laki lain,"ucap salah seorang kawanku.

Aku sedikit emo bila mendangar kata-katanya. Tapi indalah sampai kan slit wrist-ku sepertimana yang selalu dikaitkan dengan kanak-kanak emo.

"Nama laki-laki atu si Nai. Atulah yang selalu si Joyah sabut bila memanggil laki-laki atu"kata salah seorang kawanku lagi.

Oh si Nai rupanya ia punya nama. Nanti kau Nai. Berani kau kan besaing sama aku untuk mencuri hati si Joyah. Usulnya aku perlu bersemuka dengan kedia.

Alaaa, besambung tia lagi...

Read More

Lovely Couple part 1

Suasana di taman pada masa atu begitu mendamaikan dan mengilukan dada. Aku berada di samping girlfriend ku yang turut jua menikmati keindahan taman yang kami kunjungi. Di taman atu kami dapat meliat kanak-kanak gauk melipas kana uyung ulih indung durang, remaja-remaja yang sedang bergembira main carah pulis, urang begambus, amoi-amoi tua main mahjong dan macam-macam lagi. Memang mendamaikan banar taman ani. Taman yang ku maksudkan ani ialah taman bahagia dan bukannya taman bunga atau taman permainan sepertimana yang mungkin abiskita pikirkan.

Sebenarnya kami bukannya bersiar-siar arah taman bahagia ani. Kami melintasi tempat atu saja. Weird jua tu mun couple macam kami ani hangout arah tempat-tempat macam taman bahagia atu. Mana siuk kalau kan bersandiwara dan bercengkerama tu, sambil disaksikan ulih jelama-jelama yang setangah tiang.

Oh lupa ku membagitau kamu. Namaku Adi manakala nama girlfriend ku ani si Joyah. Walaupun namanya klasik, tapi jangan tertipu. Muanya lawa kali ah. Muanya inda pulang sama macam Jessica Alba, tapi Jessica Alba yang sama macam muanya. Hebat jua tu. Selebriti pulang yang kan sama macam muanya bah, bukan pulang ia yang kan sama macam selebriti. Harap-harap para pembaca baik laki-laki atau perempuan inda jealous lah.

Kami ani couple alum jua lamalah. Baru jua tiga bulan. Aku masih ingat tempat pertama kami saling bertentangan mata. Di mana lagi kalau bukan di Mall Gadong, meeting point bagi seluruh kanak-kanak emo dan shufflers di Brunei. Pada masa atu aku sedang hangout sama kawan-kawan ku becerita-cerita pasal mengapa cerita Twilight overhyped berabis. Yatah sedang aku sibuk membuat pembentangan, aku realize sepasang mata sedang memeratikan kami. Mula-mula kebeliangan jua ku, pasal ku pikir Jessica Alba yang memeratikan kami atu. Tapi kalau dipikirkan secara logik, inda jua patut Jessica Alba memakai baju kebaya.

"Eh, yo. Cuba kau liat si manis yang memakai baju kebaya pink ah. Malar diliatnya aku. Hensem kali aku ani,"ujar salah seorang kawanku yang perasan hensem walaupun yang banarnya kalau dibandingkan sama ambuk, ambuk lah lagi hensem dari ia. Yatah bila ia becakap cematu, sorang-sorang kan temuntah. Aku temuntah pulang sudah, tapi inda ku sampat mengeluarkan dari mulut pasal ku talan balik.

"Bwoh, ia kesini sama kawan-kawannya. Bah apa lagi kontrol macho sorang-sorang. Pastikan jua zip seluar kamu tetutup rapat,"tiba-tiba lagi seorang kawanku berucap apabila mendapat tahu bini-bini manis atu berjalan menuju ke tempat kami.

Maka sorang-sorang lah mengeluarkan daya penarik masing-masing demi menarik perhatian salah seorang si manis yang bejalan atu. Tapi inda pulang semuanya manis-manis belaka. Yang masam-masam manis pun ada jua lah. Inda ku tepakai tu yang masam-masam manis ah.

Sedang kami sorang-sorang kontrol macho, tanpa ku sangka-sangka si manis berkebaya pink a.k.a Jessica Alba look-alike atu memberi jelingan manja ke arahku. Kan putus jantungku meliat jelingan manjanya atu. Untuk memendekkan cerita, kami pun mula berkenalan lapas atu. Kawan-kawan ku apa lagi. Jealous lah, pasal aku yang berjaya menawan hati si manis yang bernama Joyah atu. Aku ani inda pulang hensem banar, tapi kalah jualah Robert Pattinson atu. Bukan pulang ku kan prasan. Tapi its a fact.

to be continued...

Read More

Owhhh

Rupa-rupanya total posts ku more than 100 sudah. Hopefully aku inda ketandusan idea untuk sampai 1000 posts haha. Anyway, thank you for viewing and reading my blog to my silent and non-silent readers. Insya-allah I'll try to keep this blog alive.

Read More

Wanted and Hunted

Aku berhenti setelah berlari tanpa henti-henti. Lalah ku nyamu. Sasak napas ulihnya bah. Gayanya aku ani memang nada harapan untuk jadi sebagai seorang pelari jarak jauh. Mun baru tiga minit belusir sudah kepisan. Apa lagi kalau dua jam belusir non-stop.

Balik-balik ku peratikan ke belakang untuk memastikan makhluk durjana yang menguyungku tadi nada di belakang. Makhluk durjana yang ku maksudkan atu ialah pulis. Dari tadi durang menguyungku tapi masih alum berjaya menangkapku. Kroni-kroni ku yang lain habis kana tangkap sudah ulih durang. So, tinggalah aku seorang saja. Masalahnya, pulis yang menguyungku ani bukannya seorang. Tapi 5 urang. Susah ini macam.

Karing lihir ku eh. Kalau masa ani ada extra joss atau kuku bima kan bisai. Baru bertenaga balik. Kan minum Relentless, inda tia jua ada bejual di Brunei. Kan singgah ke kadai inda jua dapat. Yang ku liat ampir-ampir ani kadai bejual kain sama kadai bejual DVD cetak rompak jua ganya. Inda apalah. Talan air liur saja.

"Eh rileks ni?"tiba-tiba seseorang menegurku tanpa membagi salam. Kebeliangan ku eh.

Suara atu adalah kepunyaan salah seorang polis yang menguyung ku. Sebelum tangannya menggapai tubuhku, aku bertindak lebih pantas dengan mengambil langkah seribu. Sungguhpun aku lalah masa atu, ku kuatkan semangat ku untuk belari. Entah berapa liter aying paluh sudah keluar dari celah-celah ketiak ku yang bebulu halus ani. Alum lagi dicampur semua paluh yang keluar dari sweat pores yang ada di setiap pelusuk badan ku ani. Kalau perkara ani berterusan, bulih mati dehydration ni aku ani. Biar tia, aku lebih rela mati dari ditangkap oleh pulis-pulis yang brengsek ani.

"Mana kau mau lari?"Tiba-tiba seorang lagi pulis muncul dihadapanku sambil mem-block laluanku. Dengan kekuatan 1000 ekor samut, aku pun melanggarnya tanpa sebarang belas kasihan. Maka ia pun jatuh terjelupuk ke tanah.

"Uy, mati kau sudah pulis?"aku sampat bertanya arahnya.

"Alum,"jawabnya.

"Bah, selamat. Aku kan menyambung larianku dulu."

Maka aku pun menyambung larian ku yang usulnya nada noktah. Selagi aku alum tertangkap, selagi atu durang menguyungku. Walau dimana sekalipun aku betapuk, kejumpahan jua durang. Payah eh cemani ani.

Sebagai seorang yang kana hunted, menoleh kebelakang atu kira sikap semulajadi sudah tu. Yatah, bila ku toleh kebelakang rupanya kelima-lima pulis yang menguyungku sudah berada di belakang. Bila mendapat tahu bad news atu, aku pun menguatkan semangatku untuk belari lebih pantas lagi. Kalau bulih tah dapat belusir macam Usain Bolt.

Malangnya, satu perkara yang andang sudah ku expect dari awal tadi berlaku ke atasku. Kedua-dua kaki ku ter-cramp. Dan aku pun terjatuh. Kejang bah kaki ku ah. Mana dapat belusir lagi ni. Tapi, aku masih alum mau mengalah. Aku pun mengheret badanku kedapan menggunakan kedua-dua tanganku.

"Bah, adangtah kan escape. Kalah tah kau sudah tu,"salah seorang pulis atu berkata kepadaku.

"Eh, kau ani. Mengalih kami membubut kau jauh-jauh. Banar-banar jua kau main CARAH PULIS ani sampai belusir sejauh 6 kilometer,"ujar seorang lagi pulis yang sebenarnya merupakan kawan sekelasku di sekulah.

"Haha sorry yo. Aku ani kadang-kadang over sikit. Yang talurnya, kamu ani sanggup jua membubut aku sampai jauh-jauh,"balasku."Bah karang tah lagi bekunyanyang. Luruskan dulu kaki ku yang cramp ah. Sakit!!"

Maka cematulah berakhirnya main carah pulis kami. Isuk-isuk main carah lain pulang. Carah duduk, carah kaki, carah tapuk, carah ais dan segala carah-carahan yang wujud di Brunei ani.

Read More