Passport

Inda ku sangka hari yang penuh berbelah-bahagi ani tiba jua akhirnya. Hari ani aku akan meninggalkan Brunei, familyku, rakan-rakanku, Auntie ku yang bernama Laudya dan kucing kesanganku, si Momo untuk melanjutkan pelajaranku di UK.

Disana karang, nada tia lagi kedengaran aku beteriak-teriak "Auntie, mana seluar dalamku!!!","Auntie, masakkan indomee!!!" dan "Auntie,tuangkan aying suam!!!". Aku akan seriously merinduimu wahai Auntie. Aku kan membawamu bersama, tapi kau inda mau membuat Visa UK walaupun ku pajal-pajal sudah. Kan ku masukkan kau dalam bag cargo, sekali inda tia jua kau muat di dalam atu. So, terpaksalah aku hidup berdikari tanpamu wahai Auntie.

Dalam beberapa jam saja lagi, aku akan belayar atau "belarai" nya urang Brunei. Masa ani aku vaining di dapan ceramin. Dengan kemeja long sleeves warna hitam berserta tie merah dan seluar hitam, ditambah lagi dengan muaku yang handsome macam Chad Michale Murray, aku nampak segak dan bergaya berabis. Kalau bini-bini meliat ni, gerenti cair ni.

Aku masih ingat 3 bulan yang lalu, aku ada menerima panggilan dari MOE.

"Hello, ani dari MOE ni ah. Kami ada berita baik ni kan kami bagitau arah Awang ah. Jangan awang heart attack ah lapas mendangar,"ujar wanita yang menelipun atu. Dalam hatiku aku tau udah, yang panggilan atu gerenti pasal scholarship.

"Eh, nada ku kan heart attack ni. Bah, bagitau saja straight to the point bah. Ani kan pakai flowery words lagi tu,"balasku yang sudah inda sabar lagi kan mendangar.

"Eh jangantah marah nah. Tahniah ah Awang Faisal, abiskita telah berjaya mendapat biasiswa."

Kan nyangku!!! Yahhoooo!!! Yesss!!! Aku dapat scholarship!!! Bahagia rasanya eh!!! Eh, tunggu. Namaku bukan Awang Faisal. Namaku Airil kali ah. Sekali ku bagitau lah arah bini-bini yang menelipun aku atu.

"Oh iakah? Minta maaf eh salah numbur tah kali tu,"jawab bini-bini atu. Alum ku kan menyambung cakapku, ditutupnya tia telipun ah.

Baik jua ku alum celebrate berabis-berabis. Mun inda malu saya tu. Adakah patut salah telipun? Aku pun berasa kecewa dan merasakan yang aku inda mungkin dapat scholarship dari MOE. Tadi durang menelipun atu supaya aku sakit hati saja tu.

Sekali inda batah atu kana telipun lagi ku ulih bini-bini dari MOE atu. Kali ani baru lurus namaku kana sabut. Rasa kecewaku bertukar jadi bahagia. Ani baru ku celebrate berabis-rabis sampai ku bawa Auntie ku menari salsa. Auntie ku atu masih bangang masa atu, tapi mau jua ia menari. Tinggal kerajanya ulihku bah.

And now sudah tanggal 14 September 2008. Masa atu berlalu dengan pantas. Sesungguhnya masa atu memang cemburu dengan kitani, sebab atu ia lakas-lakas berlalu. Untuk kali terakhirnya aku memeriksa semula barang-barangku. Nampaknya semua sudah ku bawa, nada yang tertinggal.

"Bah, ril selasai udah?Bawa tia bagmu atu keluar. Mari bapa mendangani mengangkat nah,"tiba-tiba bapaku menyapaku dari luar bilikku.

"Awu, OK udah ni. Bawa tia keluar kali,"aku membalas.

So, kami pun membawa beg-beg ku keluar. On the way keluar atu, ku liat mamaku, niniku, kakaku dan kucingku, si Momo duduk-duduk di bilik tamu. Kucingku ani asi-asi tia jua duduk di atas kerusi.

"Eh hensem ni anak mama ani,"mamaku menegurku,"abis sudah kau check segala barang-barang mu atu ril? Passport jangan lupa ah,"sambungnya lagi.

Awuwah, passportku lupa ku check. Sekali ku periksa lah lagi sekali. Cari punya cari, inda ku tejumpa. Eh, mana tia? Lagi sekali ku ruah. Nada jua. Sekali ku check lagi arah beg cargo ku. Tepaksa ku unlock kunci mangga nya atu. Tapi nada jua ku tejumpa passport ku atu. Dimana ku menyimpan ah?

"Ma, inda ku tejumpa passport ku!"teriakku dengan panik.

"Eh, kau check udah banar-banar?"mamaku membalas dengan tona suara ke-ingauan.

Aku menganggukkan kepalaku. Lapas atu belusir lah ku ke bilikku. Mana tau ku tetinggal disana. Abis ku check dibawah katil, dalam almari, dalam laci dan dalam sarung bantal. Tapi inda ku tejumpa. Lapas atu ku panggil lah Auntieku, bapaku, mamaku dan kakaku ku supaya mendangani mencari.

"Kalau nggak jumpa passportnya, pakai aja passport auntie dulu,"Auntie ku tiba-tiba bersuara.

"Eh, Auntie ani. Mana bulih ku pakai passport Auntie, bukannya ada gambarku dalam atu,"jawabku.

"Hehehe, iyaa Auntie tau. Auntie bercanda aja. Kok kamu serius banget?"

Aku pun tertawa mendangar cakapnya. Auntie ku ani kan becanda ganya. Sebab atu aku suka ia. Kalau yang lain mana saya suka tu. Sekali ku taruskanlah pencarianku. Abis ni ku cari dalam fridge, dalam periuk nasi, dalam tin milo dan dimana-mana. Tapi alum jua ku kejumpahan. Abis hilang segala ke"hensem"enku pasal mandi paluh gara-gara mencari passport.

Setelah setangah jam mencari, aku masih alum berhasil mendapatkannya. Give up ku sudah. Nampaknya inda tah ku jadi belarai hari ani ni. Mun passport nada, cemana kan belayar. Tepaksa tah membuat passport baru di imegresen ni. Batah-batah menunggu siap lagi tu. Entah, akan mengambil masa berapa lama kah ni.

"Ril, jangantah berdukacita nah. Bukannya kau inda jadi belayar kan? Ganya tepaksa di-postpone,"mamaku cuba menenangkanku sambil memeluk aku dan menggosok-gosok belakang badanku.

"Thanks for comforting me ma. Ma aku kan keluar dulu sekajap. Kan menenangkan fikiranku dulu,"aku berkata arah mamaku.

So aku pun keluar rumah menghirup udara yang inda berapa segar, pasal urang sebalah membakar sampah. Tau udah global warming, lakat jua urang ani open-burning. Sedang aku bejalan-jalan di luar rumah ku atu, aku pun memasukkan kedua tanganku kedalam poket seluarku. Andang menjadi kebiasaanku sudah tu. Tiba-tiba aku terasa sesuatu di dalam poket kanan seluarku. Macam notebook damit rasanya. Aku pun mengeluarkannya. Eh, passport ku jua ni. Disini rupanya kau betapuk.

"Ma, Pa aku tejumpa udah passportku! Dalam poketku rupanya!"aku beteriak sambil belusir masuk kedalam rumah.

"Arah poket? Macamana kau bulih inda sadar atu?"bapaku bertanya.

"Hahaha antah pa. Bah, jangantah banyak cerita. Sampat ni ke airport?"

"Sampat eh, ani baru jua pukul 5.45. Kau masuk pukul 7 malam."

Maka kami pun berinut time atu jua. Bila sampai di airport, flight ku rupa-rupanya kana delay sejam. So sampat lah ku beramah-mesra sama keluarga dan kawan-kawanku sebelum flightku. Perasaanku memang becampur-baur hari atu. Gembira jua, sedih jua. Tapi demi masa depan, ku tulak perasaan sedih atu ke siring. Bukannya selama-lamanya aku kan meninggalkan Brunei jua.

ps: This story is dedicated to all students who are currently studying overseas and also to those who will be leaving Brunei soon.

Posted in: