007.5:The Spy Who Spoilt Me-part 17

previously: Masa 007.5 dibawa ulih Mikail Sekupil ke satu tempat, tiba-tiba dua urang agent bini-bini menyelamatkannya.

Agent bini-bini atu pun membuka ikatan ku. Antah macamana kekalatan mataku bulih hilang serta-merta sedangkan tadi aku sudah tekana semburan sleeping gas. Mungkin pasal keseksian tubuh agent bini-bini ani kali yang membuatkan mataku 'tercuci' secara automatik. Finally, semua ikatan ku sudah pun terbuka. Dan aku pun berdiri dengan bangganya. Freedom!!! Finally!!!

"Bukkk!"tiba-tiba aku terabah semula pasal kakiku masih numb, pasal teluan batah kana ikat atu kali. Hilang macho tarus eh.

"Ok kau 007.5?"tiba-tiba agent bini-bini atu betanya arah ku sambil menulung membanguni aku supaya bediri balik. Wow, ia tau namaku! Udah nyangku, aku ani famous.

Lapas ku dapat bediri dengan stabil, bini-bini atu pun mengarahkan aku supaya me-rescue The Bodyguards & si Alyssa, sementara ia dengan kawannya akan meng-handle si Mikail Sekupil & si Pikachu yang masih ampai-ampai di lantai. Tanpa bepikir panjang, aku ikut saja cakapnya. Aku pun berlari-lari anak menuju ke bilik dimana The Bodyguards & si Alyssa kana tapuk.

Tapi taskku atu inda semudah yang ku sangka. Didalam perjalanan ku atu, terserempak tia ku jua dengan members Kubra Gang Brunei. Dalam sepuluh urang lah semuanya. Barangkali durang tedangar bunyi kaca pacah atu kali, iatah kan begagas kesana kali. Kacau eh abisdurang ani. Anikan urang gagas jua.

Apabila durang teliat aku, durang pun beranti belari. Aku pun tepaksa tah stop jua. Sorang-sorang start meliatkan mua karas masing-masing. Ada jua yang start flexing durang punya muscle, walaupun pengliatanku durang atu inda be-muscle. Belamak adalah. Ceh, ingat aku takut lah tu! Sedangkan si Batista WWE atu lagi dapat ku kalahkan, apatah lagi abisdurang yang macam si-taie ani.

Durang pun mula berlari menuju aku, bersedia dengan penumbuk dan penerajang masing-masing. Sambil tersenyum sinis, aku pun mengumban sleeping gas grenade yang kucuri dari agent bini-bini yang menulungku tadi. Hahahaha mana bini-bini atu sadar tu aku "meminjam" barang 'bagus'nya ani. Masa grenade atu arah mid-air sorang-sorang ahli Kubra Gang Brunei atu belarian. Pandai pun takut.

"Lari, lari!Mati kamu karang!Kalau mati, cemana kan membayar puasa kitani yang selalu inda full atu karang!"teriak salah seorang ahli Kubra Gang Brunei. Tapi Apa bulih buat, its too late untuk escape. Apabila grenade atu mencium lantai, gas pun tekeluar. Aku begarak kebelakang sedikit supaya inda tekana sleeping gas atu. Mun tekana, atu syabas tu. Dalam masa yang singkat kesemua sepuluh ahli Kubra Gang Brunei atu pun lena dibuai mimpi. Macam anak damit saja abisdurang ani. Ada tia jua yang sampat mengisap ibu jari. Syabas!

Sedang durang siuk-siuk tidur bekuruh, aku pun meneruskan perjalananku. Harap-harap lapas ani nada lagi distraction. Mengalih ku ni nyamu. Lapar lagi parutku ani. Mun cemani tiap-tiap ari, kurus cangkir mengalahkan tulang kali ku.

Setelah berjalan beberapa meter, akhirnya aku pun sampai ke destinasiku. Aku pun membuka pintu atu, tapi inda tia mau. Elah, bekunci tia jua. Kacau si Mikail Sekupil atu, adakah dikuncinya pintu ani. Cemana gayanya aku kan masuk ni.

"Nah kuncinya,"tiba-tiba seorang lelaki bersuara dibelakangku membuatkan aku terkezut. Dengan automatik aku pun berpusing dan menggenggam tangan laki-laki atu dengan pantas sambil membuat wrist-lock. Si Johnny rupanya. Banci banar ku meliat muanya ani.

"Adahhhhh!!! Oi sakit wah!!! Aku ani agent USRB sebenarnya bah!!"teriaknya.

"Kau ingat aku pecayakah? Berapa kali aku tertipu ulihmu!"aku membalas.

"Awuuu banar, sumpah!! Aku ani double agent sebenarnya.. Aku kana suruh menyamar jadi Ahli Kubra Gang Brunei."

Untuk membuktikan yang ia atu agent USRB, aku pun betanya arahnya full address USRB. Lurus tia jua jawapannya. So pecayalah ku yang ia atu ahli USRB. Si Johnny pun belumpat-lumpat sambil memigang wristnya yang sakit. Labeh jua ia ani eh, mun sakit, inda jua payah kan telumpat-lumpat. Aku pun mengambil kunci yang tegugur dari pigangannya tadi.

"First of all, aku kan minta maap arahmu pasal malar menyusahkan kau. By the way namaku bukan Johnny, namaku Hakeem. Aku agent 007.6."ujarnya sungguhpun inda ku betanya arahnya. Ada point six lagi tu!

"Bah karang tah kau minta maap. Ani kan gagas tani ni. Kalau kau belanja makan aku di capers baru ku memaapkan kau,"jawabku sambil memasukkan kunci ke dalam keyhole. Lapas beberapa kali kunci atu ku putar, akhirnya pintu atu pun terbuka. The Bodyguards dan si Alyssa terbangang meliat aku dan si Johnny, eh salah... si Hakeem. Without wasting time aku & si Hakeem pun membuka ikatan abisdurang.

Posted in: