Pepsi

This incident happened a long time ago, masa aku darjah 5. Back in 1999. Wow, 9 tahun yang lalu rupanya tu. Hancing lakat eh hahaha. At that time, usulku compare to now memang lain. Dulu aku berisi as in bulat. Sekarang ani berisi pulang jua, tapi inda bulat lah. Hahahaha. Dulu randah sekarang tinggi (duh... indakan makin randah kan).

Bah, malas ku becerita panjang-panjang pasal usulku time atu. Bukannya interesting jua. Ok cemani kisahnya, time atu masa hari raya. Hari raya kedua kali kalau ku inda silap. Hari raya kedua ani memang jadi kebiasaan my family mengadakan open house. Hari raya masa masih kanak-kanak ani memang siuklah. Especially masa kana bagi paket hijau yang berisi $$$. Ani kana bagi pulang jua lakat =P. Hahahaha maybe in the next few years indatah kana bagi lagi tu. Cis!!

Masa open house ani selalunya enjoy saja ku ni. Belusir-lusir sama cousins yang sebaya, main game dan sebagainya. Pokoknya kan tau bemain ganya lah. Inda tau malulah dulu atu hahaha. Tapi sudah basar ani inda lagilah cematu(except yang part main game atu). Masa ani of courselah mendangani my parents melayan urang, memanyap-manyap cawan dan piring, menyediakan minuman dan membagi angpau (since my parents nada daughter and kami inda lagi ada amah). Mengusai cucul pun aku jua tu walaupun selalu bida resultnya hahaha. Biar tia wah, asal tarang rumah masa malam-malam.

Mengapa kurapak ku aku ani selalu melarat ah? Hahaha alum jua start-startnya kisah ku ani. Bersabarlah wahai para pembaca sekalian. Dalam sedikit masa lagi tu. Sebabnya aku kan share sedikit pengalaman berhari raya, meskipun hari raya batah lagi. Salah time ni aku ani, patutnya kisah ani diceritakan time hari raya. Tapi inda apalah, melajak sudah kan. Indakan ku cancel. Besides dapat angpau dan makan pree (iatah nyaman ni) masa open house, yang siuknya lagi masa raya ani ialah bekonvoi. Sama kawan atau sama relatives, dua-dua siuklah. Makin banyak makin meriah. Lapas atu melanggar rumah urang. Bukan melanggar as in banar-banar melanggar ah. Karang abis rusak rumah urang mun kan dilanggar-langgar.

Ok, empat paragraph sudah usulnya. Ok tah kali ni kalau ku start becerita. Cemani kisahnya, masa kami open house ani kan, aku sama adiku (masa atu baru berumur 4 tahun) ani sibuk-sibuk tia jua kan makan hidangan yang sebenarnya untuk guests. Tapi nada pulang guests time atu, iatah kami makan atu. Nyaman lah, pasal makan pree kan. Inda ku ingat apa yang ku makan atu, pokoknya makanan lah yang kami makan atu (duh..). Iatah siuk-siuk makan ani, adiku kan ke jamban. Iatah suruhnya aku menuang pepsi untuknya. Sekali ke jamban tia.

Sekali ku bukalah bottle cap pepsi atu. Kan ku tuang sudah ni ke galas, tapi stop ku, lapas meliat 'this thing' yang ampai-ampai atas meja atu. Maka timbullah niat ku yang inda seberapa jahat bagiku. Muahahaha.

Alum batah atu datang tia adiku ani. Ku bagilah lah galas yang berisi pepsi atu sambil membagi senyuman sinis arahnya. Baik jua ia alum pandai menafsir kesinisan senyuman ku atu. Sekali ditaguknya tia pepsi atu sambil aku memeratikan ia dengan rasa puas hati. Tiba-tiba beranti tia adiku minum ah, sambil membagi ekspresi muka yang menunjukkan inda kenyamanan dengan apa yang diminumnya atu.

"Lain jua rachanya pepchi anie?"tanya adiku sambil meletakkan galas yang dipigangnya atu.

"Mistilah lain pasal KICAP yang kau minum atu!!"jawabku sambil ketawa-ketawa.

Lapas atu belusir lah ku, sambil kana bubut ulih adiku. Escape wah, sebelum adiku mengambil apa-apa tindakan arahku. Hahaha kanak-kanak tah banar. Sebenarnya, 'this thing' yang ku mention earlier atu ialah botol kicap. Kicap warnanya hitam kan? Iatah instead of menuang pepsi, aku tuang kicap atu ke dalam galas adiku. 'Nyaman' tu eh. Hahaha syabas!!!

Posted in: