My Term Break Part 16

previously: On the way aku & si Veronica ke bilik Buajah Timah, kami kana attack ulih seorang uncle tua yang inda kami kenali.

Sambil mencabut uban-ubanan di kepalanya, uncle tua atu mengarahkan kami supaya keluar dari lif. Tanpa sebarang bantahan pasal takut kana timbak, kami pun ikut saja cakapnya atu. Inda disangka walaupun badan uncle tua ani kurus cangkir macam si saiful apek, rupa-rupanya bad-ass urangnya. Apanya peribahasa, "Jangan disangka wallet yang tabal, berisi usin". Peribahasa baru tu bui. Copyright reserved tu ah, jangan kamu cuba-cuba kan menyimbat.

"Bui, kesian ku meliat kau menyikut back-pack ah. Maritah aku menggantikan kau menyikut,"tiba-tiba uncle tua atu berkata arahku. Lahhhh, urang Brunei rupanya uncle tua ani. Sudah nyangku tadi masa di lobby, ia ani macam urang Brunei, ganya malas ku menagur pasal galat-galatan ku.

Obviously urang tua ani interested arah backpack yang ku sikut atu. Gila, apa kan banar barang dalam ani sampai sanggup urang teuyung sana, teuyung sini, menimbak sana, menimbak sini kan merabut backpack ani. Amas kali dalamnya ani. Tapi inda jua patut, mun inda, terasa tia barat. Mati eh, apa kan barangnya dalam ani. Bebulu utakku memikirkan.

"Paji, jangan tah kita sikut deh. Kita atu tua kan mati.Karang patah tulang kita. Payah pulang kita duduk kan beria pulang karang,"balasku dengan kurang ajar. Since ia urang tua yang bad-ass, inda apalah kalau aku kurang ajar arahnya.

"Apa nyamu? Kurang ajar jua kau ani. Inda kau belajar MIB di sekulah kah ah?"kata urang tua atu menghampiri aku sambil megacukan pistolnya tepat arah kepalaku. Oh sh*t, menyasal ku becakap cematu arahnya tadi. Syabasss. Usulnya mati tah ku kali ni sebelum ku sampat kawin. Syabasss lagi sekali.

Alum pun ku sampat mengucap dua kalimah syahadat, inda semana-mana pistol yang diacukan arahku atu telapas dari tangan uncle tua atu sambil terabang ke udara.

"Bukkk!!!"bunyi pistol atu lapas ia jatuh ke lantai.

Kami semua tediam meliat kejadian atu. Usulnya behantu kali hotel ani. Inda kan pistol bulih tarus-tarus telapas dari tangan sambil terabang ke udara. Yatahnah, inda kana baca-bacai kali bah hotel ani. Mun hantu banar, dapat ku kongsikan arah "antubrunei.blogspot.com" nanti ni.

Inda batah atu uncle tua atu tepelanting secara tiba-tiba macam kana terajang ulih urang. Memang pun urang yang menandang kedia. Lahhh pikir hantu tadi yang menerajang. Di dapanku ada seorang buajah memakai scarf putih di kepalanya bediri sambil kaki kanannya terangkat keatas. Buajah Timah kah ni? Ia kah yang menerajang uncle tua atu? Hebat jua. Inda ku sangka badannya yang buntak lamak ani pandai bekelaie. Apa nya peribahasa, "Jangan disangka gigi yang putih, inda betaie." Ani pun peribahasa baru jua. Copyright reserved jua ni. Jangan kan memandai-mandai menyimbat. Ku gelitik ketiak kamu karang mun kamu simbat suka-suka hati.

Walaupun kana terajang, masih jua mampu uncle tua atu bediri. Kalau aku kana terajang cematu atu, antah eh. Kembali kerahmatullah kali sudah. Ani hidup jua masih. Inda patah tulang-bendulangnya kah. Gerenti malar minum susu ni dari damit.

"Haji Kassim, agatah balik. Adangtah kan menyimbat 'barang' atu dariku. Ani masuk kali ke 10000 sudah kau fail ni. Give up tah!"terais buajah atu.

"Ceh, inda apa Kajah! Malam ani malam mu! Jangan ingat aku give up sudah! Nanti kau!"jawab uncle tua yang dikenali sebagai Haji Kassim atu. Ia pun meninggalkan kami tanpa mengucapkan babai.

Antah buat kali ke berapa, aku terselamat dari maut. Baik jua ada buajah Timah ani. Mun inda pacah kali kepalaku kana timbak ulih Paji Kassim tadi.

"Thank you buajah Timah. Mun nada kita tadi, mati katak kali ku sudah tadi,"aku mengucapkan terima kasih arahnya.

"Ihhhh bukan Buajah Timah ni aku ani laiii!"jawabnya.

Eh, mun ia ani bukan Buajah Timah, siapa tah ni?

Alaaa besambung lagi...

Posted in: