Teenage Angst part 1

Kawan-kawan ku semua menggalar aku dengan nama Chris. Tapi atu hanyalah sebuah nama glamour untuk menarik perhatian chicks yang hot dan sizzling. Bukan anak ayam ah. The ladies bah. Kamu ani macam inda paham saja.

Mun kamu kan tau, nama sebenar yang dibagi ulih kedua indungku ialah Kerispatih. Durang atu peminat fanatik band Kerispatih bah. Yatah namaku cematu atu. Baik jua durang atu bukan peminat Project Pop. Mun inda, kana namakan Project Pop tah ku kali jua tu.

Aku tinggal di sebuah perkampungan yang aman damai. Social life disini ani kira bagus jualah. Hampir setiap penduduk di kampung ani kenal antara satu sama lain. Ganya masalahnya, perkampungan ani tersembunyi dari cahaya matahari. Semua kulit-kulit penduduk disini ani nada yang galap. Semuanya cerah.

Selagi ku damit, aku inda pernah meliat cahaya matahari. Aku mendapat tau dari mendangar cerita-cerita urang tua saja.

"Mun kamu langui sambil meliat cahaya matahari atu, silau tu nyamu. Pakal ganya daulu atu indada kacamata Ray Ban bejual bah,"menurut cerita salah seorang uncle yang pernah bepadah arahku.

Kadang-kadang terlintas jua hatiku kan meliat cemana usul dunia luar atu. Ani beparam saja dalam kampung. Boring bah. Aku mau jua meliat cemana usul bini-bini diluar atu. Kan menambah senarai dalam calon girlfriend bah. Mana tau ada jodoh kamu ani. Masa ani inda pulang banyak dalam senarai ku ani. Ada jua dalam 1500 lah. Inda banyak kan tu? Inda eh. Mana banyak.

"Hoi!"tiba-tiba seseorang mengajuti aku. Mati eh. Kebeliangan ku ulihnya.

"Eh kau ani Damit! Selalu mengajuti aku. Baik jua inda keluar penyakit kencing manis ku kau ani!"ujarku arah kawanku yang bernama si Damit. Namanya atu si Damit bukan pulang pasal ia atu damit badannya. Ku dangar dulu masa nya baru lahir instead of menangis ia beterais menyabut "Damn it" bah. Sekali kana bagi nama "Damit" tia. Bisai bah cara indungnya membari nama ah. Dari "Damn it" ke Damit. Syabasss.

"Apa saja yang kau angan-angankan ani? Teringatkan si Joyah kah?"tanya si Damit. Ia ani kalau sehari inda menyaya aku inda sah ni.

"Apa pulang si Joyah. Atu ex ku tu bui. Masa ani aku sama Gayah kali ah."

"Bah, kalau ex inda dapat inda rindu kan?Hahaha."

Nah kana ku balik. Mati eh si Damit ani. Pakal ganya ia ani best friend ku. Mun inda, abis sudah pusatnya ani ku cucuk-cucuk sama pensel.

Inda batah atu, beberapa urang geng-geng ku lain lagi datang untuk melepak & mengacai sama-sama. Si Garip, si Toyib & si Bub. BFF sejak lahir ni kami ani. Jangan kamu macam-macam.

Dalam siuk-siuk melepak & mengacai atu, aku pun becerita lah apa yang ku angan-angankan tadi. Yang pasal kan meliat dunia luar ah.

"Chris, aku pun sebenarnya pernah tepikir cematu. Tapi kitani ani masih remaja. Alum cukup umur bah kan kana banarkan keluar,"kata si Garip sambil menggaru-garu ketiaknya sebalah kanan.

Atulah masalahnya. Umur yang jadi penghalang bah. Siapa kah talur banar kan suka-suka hati membuat undang-undang inda logic cematu atu.

"Chris!!!"tiba-tiba ada suara bini-bini melagau aku.

Siapa lagi ni.

Posted in: