Spy Game

Kamu pernah kana stalk? Or kamu yang stalk urang? Hahaha. Aku inda pernah pulang kana stalk (setau ku lah), tapi men-stalk urang pernah. Bukannya aku stalking secara solo, tapi be-group. Hahaha syabas!

Masa atu aku form 2. Yang dangan ku stalking ani si Aki, si Rujhan and si Wafiy. Mastermind nya si Aki haha. Tapi kami anggap apa yang kami buat atu as spying instead of stalking. Yang kami 'spy' ani seorang bini-bini form 1. Kami 'spy' ia bukan plang pasal ia atu lawa (tapi lawa pulang ia atu) atau kami suka ia. Adalah lah tu sebabnya mengapa kami 'spy' ia atu hahahaha. Namanya? jangantah di-expose eh.

FYI si Aki ani ada 'gang' sudah ni darinya primary school. Iatah dibawa-bawanya ke MS. Indaku ingat apa nama 'gang'nya atu. Si Rujhan & si Wafiy atu ia punya loyal members tu, pasal durang sama sekulah sama si Aki dulu. Aku ani kira a newcomer lah. Newcomers lain yang ku ingat: si kam & si Alli.

Projek 'spying' ani dikemukakan ulih si Aki kepada aku, si Rujhan & si Wafiy masa morning session. Kira meeting lah tu. Baik jua kami ani sekelas, sanang buat meeting. Projek 'spying' kami ani akan dimulakan operasinya masa tengahari, before kami ada ugama session. Damit-damit pun kan be-meeting kami ah. Mun meeting kan membuat kemajuan baik jua, ani meeting kan main-main hahaha. Kanak-kanak tah banar.

Tunggu punya tunggu, ahirnya pukul 12.30 tia jua. Abis morning session udah. Mula-mula tukar baju ugama dulu before lunch. Kalau lunch dulu, takut banyak delay. Liat saja tah urang yang bekeraja. Batah bah kalau durang break atu. Keraja di pejabat alum siap, tapi masih lepak-lepak minum kopi. Sama tah jua kesnya di sekulah tu hahahaha.

Lapas abis betukar pakaian ugama, ke kantin lah kami. Kelurusan ada bini-bini yang kan kami 'spy' atu ada disana jua. Iatah start dari sana kami 'spy' ia. Eksyen-eksyen lah makan, tapi mata malar arah bini-bini atu.

Masanya beredar, kami pun beredar jua. Tailing ia di belakang. Supaya inda ketara kami naik ke tingkat atas. Tapi laju-laju kami ke atas supaya ia inda hilang dari pandangan kami. Ia masih ugama darjah 5, so kelas nya di tingkat bawah. Kira Sanang kami memeratikan ia dari atas. Masa ia masuk ke kelasnya kami tunggu ia sampai ia keluar.

Sekalinya keluar tia bini-bini atu. Kali ani kami ikutkan ia di tingkat bawah. Iatah masa kami turun, ia melintas dapan kami. So, kami ikutkan dari belakang. Sekali....... Bepaling bini-bini atu ke arah kami dengan expression mukanya yang ter-annoyed.

"Kamu ani nada keraja lain kah?"sergahnya.

Speechless kami tarus eh. Rupa-rupanya ia tau udah kami 'spying', atau lebih tepat STALKING ia atu. Lapas atu, macam biasa, pandai-pandai lah kami bongkis. Hahahahaha

Moral: kalau inda pandai men-spy urang, jangantah si-taie kan men-spy. Kalau kamu atu Solid Snake atau Sam Fisher mana saja. Hahaha

Posted in: