007.5: The Spy Who Spoilt Me Part 10

Aku menoleh ke kiri dan ke kanan. Sebantar alum ada urang ani, baiktah aku pindahkan dulu badannya ani dan trolley yang dibawanya ke dalam bilikku. Lapas ku memindahkan, duduk ku sekajap di atas katil ku. Lalah jua eh lapas bekelaie atu. Ketara bah inda fit ah. Mun ku tau tadi, minum kukubima atau ali cafe ku. Masa aku rilek-rilek atu inda semana-mana teringat tia ku parang yang di pakai ulih urang yang menyerang aku atu. So, keluar tah ku balik.

Bisai parang ani ampai-ampai. Syabas! Mun urang teliat ni, gerenti menimbulkan kemusykilan ni. Baiktah ku bawa ke pindahkan before ada urang teliat. Sebelum ku sampat memutik parang atu, tiba-tiba muncul seorang lelaki berambut lasak di hadapanku. Terkezut ku eh. Bukannya apa, pasal muanya atu macam Zinedine Zidane. Style rambut pun kan sama. Pakai baju France lagi tu. Si Zidane kali banar ni. Di sebalahnya atu ada seorang wanita yang mengapitnya. Bininya kali. Cantik berseri-seri jua bininya ani. Wow!

"Minta maaf wang. Tadi tedangar ku bunyi bising di kawasan sini ani. Ada si Awang tedangar jua tadi?" tanya lelaki atu. Bukan tah si Zidane ni. Indakan si Zidane pandai cakap melayu. Lagipun bahapa jua si Zidane kan vacation di Limbang.

"Owh, bunyi bising.........? Errrr..... Ahhhhhhh!!!! Jangan-jangan yang kita dangar atu time ku mengampas-ngampas lipas-lipas liar yang bekeliaran di sini ani kali tadi?"jawabku dengan spontan sambil mengangkat parang yang ampai-ampai di bawahku. Tepaksa menipu bui, mana tau durang ani spy jua.

"Menghampas lipas indakan sampai membawa parang?"tiba-tiba bininya pulang bertanya. Wah, soalan panas lagi dibaginya ani. Kalah Brunei panasnya soalannya ani. Ok. Think, think.... Apa baik penjawabku ni... Come on, come on...

"Anu.... tesalah bawa ku tadi! Ku ingatkan shieldtox tadi, rupanya parang! Hahahaha"ujarku memberi jawapan yang usulnya inda berapa convincing. Syabas! Harap-harap durang pecaya lah. Kabak-kabak ku pulang nah.

Alhamdulillah, usulnya durang berpuas hati dengan jawapan ku atu. Lalu, durang pun meminta diri. Phew!!! Selamat!!! Sebelum hilang dari pandanganku, si Zidane look-alike atu sampat berpesan arahku supaya meng-ignore saja lipas-lipas liar yang berkeliaran. Hotel murah andang cematu tu nya. Nah, kedapatan tia aku tidur di hotel murah! Spoil si Zidane ani eh!

Posted in: