The Detective Returns - Part 7

Meliat situasi ani mengingatkan aku arah scenes dalam movie. Baik arah movie Hollywood, Bollywood, Melayuwood, Chinawood atau yang seumpamanya, mesti ada scene cemani ani. Tapi yang ku liat ani bukannya movie, tapi belaku di dapan mataku banar-banar. Laki-laki atu mengugut memutung lihir si Suraya kalau aku menghampiri ia. Kalau ada pistol ku timbak sudah ia ni. Tapi macam tah aku pandai menimbak jua. Silap-silap lain pulang yang ku timbak karang.

"Rileks bui, rileks. Sudah ku bagitau, jangan suka-suka ati mencabut nyawa urang ani. Tugas malaikat Mikail bah tu!"ujarku cuba menenangkan fikirannya.

"Pffft. Malaikat Izrail bah. Izrail!! I.Z.R.A.I.L"teriaknya sambil memigang dahi dan menggiling-gilingkan kepalanya.

Aduh, makin mental ada ia pulang. Salah line bah aku atu. Adakah pelajaran Tauhid ku bawa-bawa. Aku pun inda ingat berapa gred ku untuk subjek Tauhid masa exam ugama dulu. Masuk ani dua kali ku sudah salah sabut malaikat yang ditugaskan mencabut nyawa. Laki-laki atu pulang meluruskan aku. Malu saya eh. Ex-student University of Cambridge saja aku ani. Karang balik rumah baiktah kali ku minjam buku-buku ugama mamaku. Revise semula pelajaran ugama. Pelajaran Munakahat lah kali yang ku patut dalami banar-banar. Favourite topic kali ah masa darjah 6 dulu heheh.

"Awu, awu.. Izrail. Kau tah paling handal nah. Manang tah kau,"jawabku yang ter-annoyed.

Laki-laki atu pun kemudian membawa si Suraya keluar secara perlahan-lahan. Manakala pisaunya masih terhunus di lihir si Suraya. Sampai oren-oren ulihnya bah lihir si Suraya tekana bagas-bagas kaya yang masih melakat arah pisau atu. Inda ia menjilat langis pisaunya kali tadi laki-laki atu. Eeeeeeeee gali ku eh. Baik jua bukan aku yang jadi hostage. Mun inda tekana kali ku segala kuman-kuman dan bakteria-bakteria dari aying liur laki-laki atu yang melakat di pisaunya. Silap-silap bulih tekana kuman kencing manis kali ku. Lapas atu menjangkit arah kediaku. Eh tunggu...., kancing manis bukannya penyakit bejangkit. Apalah aku ani.

Bila laki-laki atu membawa si Suraya keluar, aku pun turut keluar.

"Jangan ikut aku bah! Ku bunuh karang si manis ani!"laki-laki atu mengugut ku lagi.

"Sabar, bui. Sabar. Sebelum kau bunuh ia bagitau aku dulu apa salahnya ani arahmu sampai kan bebunuh-bunuh ani?!"

Laki-laki atu terdiam bila mendangar soalanku manakala si Suraya masih lagi menangis dan inda mampu berbuat apa-apa.

"Ia.... Ia.... Ia ani.... pernah melanggar best friend ku si Bob! Lapas atu ia escape tanpa menyelamatkan
kedia. Kalau dibawanya ke hospital hari atu, gerenti si Bob hidup masih bah!"ujar laki-laki atu yang mula mengeluarkan air mata. Cheh, harap muka saja karas tapi menangis. Mun saya, malu saya tu.

Mendangar kenyataannya atu memang sukar untuk dipercayai. Banar atu inda si Suraya pernah langgar lari, hanya si Suraya yang tau.

"Bi...bi..bi..la...la...bila ku melanggar u..urang ani? Ja..ja..jangan main tu..tuduh-tuduh a..ani dihhhh,"sampuk si Suraya kajar-kajar.

"Kau diam!! Saddap you!! Jangan kan eksyen-eksyen, aku nampak dengan mataku sendiri kau melanggar si Bob. Kau pikir nada saksi kah? Aku disana bah time atu! Aku nampak kau keluar sekajap dari keritamu, lapas atu kau lari tanpa menyelamatkan si Bob!"

Aku inda tau mana satu yang kan ku pecaya. Mungkin cakap laki-laki atu banar atau ia ani sebenarnya urang gila so ia buat-buat cerita. Siapa banar atau siapa salah,yang penting aku mesti selamatkan si Suraya. Misti ku buat sesuatu immidiately ni. Kalau dibiarkan macamani lama-lama, bad ending tia karang. Aku mana mau bad ending.

Posted in: