The Detective Returns - Part 6

Previously: Detective Zack berjaya menemui si Suraya di sebuah pondok secara inda sengaja. Inda batah atu ada seorang laki-laki beterais dari belakangnya.

Obviously bukan nenek kebayan yang beterais arahku atu bila ku menoleh kebelakang. Arah pintu atu berdiri seorang laki-laki yang inda seberapa kacak serta karas muanya macam batu. Jangan-jangan batu pun kalah kali. Mun diumban batu ke muanya, batu atu pulang pacah kali. Usulnya muda pulang masih si karas ani. Dalam 40 labih lah kali umurnya. Tapi dibahagi sama 2. 40 divided by 2 equals to 20. So, pokonya ia ani dalam umur 20 lah.

"Kalau kau inda mau nyawamu dicabut, baik kau bagitau namamu dulu!"ujar lelaki atu kepadaku sambil menunjuk-nunjuk aku.

"Sabar, sabar... Bawa betunang.. Bawa betuna.... Eh, salah!! Bawa bertenang, bawa bertenang! Jangan suka-suka ati kan mencabut nyawa urang ani. Setau ku, malaikat Israfil ganya mencabut nyawa urang ani!"balasku yang cuba menenangkan kedia.

"Apa pulang Israfil!! Izrail kali ah!! Kau ani pass sekulah ugama kah inda ah?! Bah, minta namamu!!"

Cemana ni ah. Bagitau kah inda. Ah, bagitau saja lah. Janji aku selamat. Tapi bagitau nama eksen saja. Macam tah ia kan men-check IC jua.

"Namaku Achai Randy bah! Puas hati sudah?!"ujarku dengan macho. Harap-harap ia berpuas hatilah.

Ia pun menganggukkan kepalanya. Pecaya ia! Talur banar ia ani. Inda tau kana tipu bulat-bulat. Lapas menganggukkan kepalanya, ia pun menyaluk beg yang dibawanya. Macam mencari sesuatu saja usulnya. Saluk punya saluk, akhirnya ia pun mengeluarkan sebilah pisau. Bukannya pisau cukur, tapi... pisau memutung ayam. Lalu dihalakannya pisau atu ke arahku. Uh oh... Abis ku ni.., abis! Mati tah ku ni! Tau ia rupanya aku menipu namaku!

Didalam keadaanku yang tungkal atu ia pun mengeluarkan sebungkus ruti paun Gardenier dan kaya cap Sablis. Lalu disapukannya kaya atu ke arah ruti paunnya pakai pisau memutung ayam atu. Saspen eh. Kan makan ruti paun rupanya.

Sedang ia siuk-siuk makan, aku pun membanguni si Suraya. Abis ku tampar muanya, ku cubit pahanya, ku picit jerawatnya & ku gelitik tapak kakinya supaya tebangun. Usahaku akhirnya membuahkan hasil. Si Suraya pun tebangun. Tapi masih dalam keadaan separuh sadar.

"Hoi, jangan kau kacau bini-bini sialan atu!! Kalau kau kacau, ku bunuh kamu bedua!!"tiba-tiba lelaki atu bersuara. "Tapi tunggu aku abis makan ruti paun inti kaya ani dulu. Lapar ku ni,"sambungnya lagi.

Sah tah ni laki-laki ani tah yang meng-kidnap si Suraya. Kalau kan diikutkan hati, bulih pulang ku escape ni, ganya pengkidnap si Suraya ani memampan pintu tia jua. Makan lagi disana tu. Very smart man ia ani eh. Apakah susu yang diminumnya masa lagi damit ni. Jangan-jangan Nespray kali dituntumnya dulu. Aku apa jua ganya, mun sekadar minum Enfagrow.

Lapas betarap, laki-laki atu pun menaruh semula ruti paunnya dan kayanya ke dalam beg. Tapi pisaunya masih lagi dalam genggamannya. Ia pun menggilat pisaunya atu yang masih ada bakas-bakas kaya sambil menantang kami. Ganas lah tu kononnya. Mun menggilat darah ok lah, ani menggilat kaya.

Masa ia menggilat-gilat pisaunya atu, tanpa disedarinya, semua ikatan di tangan dan di kaki si Suraya abis sudah ku buka. Bijak aku ani eh. Yatah long-term effect minum Enfagrow masa lagi damit tu. Bulih jadi urang yang bijak pandai macam aku bah.

Tiba-tiba si Suraya bediri dan tarus belusir menuju ke pintu. Eh, terkezut ku eh! Pikirtah alum sadar sepenuhnya ia ani. Tau-tau lapas ikatannya abis ku buka, belusir tia ke pintu.

"Eh, kan ke mana kau dang?! Si manis ani tah banar,"ujar laki-laki atu sambil menangkap si Suraya. Kemudian di halakan pisaunya atu ke leher si Suraya. Si Suraya pun apalagi, beteriaklah sambil meronta-ronta meminta lapaskan diri.

"Zack, tulung! Aku inda mau mati awal!"teriak si Suraya arah ku.

Aduh, macamana ni. Talur bah si Suraya ani. Tau sudah laki-laki atu di pintu, aganya jua ke pintu. Ani menyusahkan diri tia pulang nah. Time is running out. Mesti ku pikirkan sesuatu ni laju-laju supaya si Suraya selamat.

Posted in: