My Term Break part 14

previously: Aku kana tarik keluar dari Brunei Hall ulih si Veronica secara paksa. Mau inda mau tepaksa ku ikut jua. Mun sudah namanya kana paksa tanpa kerelaan hati kan. Malam atu tah kami mengantar backpack arah buajah Timah walaupun masa mula-mulanya planning kan mengantar isuk pagi. On the way ke rumah Buajah Timah atu ada dua buah kerita ungu tailgating kami.

Selama ku hidup 20 tahun ani, inda pernah ku experience cemana Driver F1 driving, tapi yang ku tau masa ani si Veronica driving laju kan mati. Kerita kijang tia lagi. Inda ku sangka kerita kijang pun dapat achieve kelajuan tahap maharaja cemani ani. Gerenti be-modify ni. Mun kerita kijang biasa nada cemani ani.

Sekajap lane kanan, sekajap lane kiri. Kerita kiri kanan. Speed laju kan mati. Gila, mati jua ku karang ni. Aku inda mau mati awal. Aku mau kawin dulu. Ani be-girlfriend pun alum.

Dua-dua buah kerita purple atu masih jua inda mau mengalah. Turut-turutan tia jua kan laju. Tukar-tukar lane sambil inda ingau kerita kiri kanan. Rasa bah kan mau keep up sama kami ah.

Lama-kelamaan, kerita-kerita yang menguyung kami atu hilang dari pandangan. Inda cukup laju kali. Salute ku sama kerita kijang si Veronica ani. Awu, walaupun kijang nyamu, speed kalah F1 bui. Lewis Hamilton pun respect kali ni mun meliat. Aku yang jadi passenger ani bukan saja respect, tungkal pun ada bah. Syabas. Kalah roller coaster. Kan tekeluar ganya inda biji mata ku ani. Bulu hidung ganya inda ku dapat tahan dari tekeluar dari lubang idungku. Tapi inda semualah. Adalah kali tinggal dalam beberapa utas.

"Gila, apa kan barang dalam backpack ani sampai kana uyung ani. Baik jua ku masih benyawa, bejantung, bekumis apa,"kataku kepada si Veronica.

"Udah nyangku, barangnya atu illegal plus berharga berabis di UK. Yatah durang mau merampas atu,"jawab si Veronica sambil memigang steering kerita dan me-misis (message) urang. Antah siapakah di-misis nya atu. Time-time driving lagi tu. Anak-anak muda di Brunei please dont try this masa driving. Mati kamu karang. Tapi kalau kamu kan mati awal, mana saja pulang. Aku inda pulang kisah eh. Si Veronica ani usulnya pro udah ni. Aku pulang yang nervous meliat bah. Matanya lagi inda meliat dapan. Mati jua karang ni.

Tapi usulnya malam atu, malaikat maut alum bersedia mengambil nyawaku. Alhamdulillah, ijap ku sudah tadi. Sampai bepaluh-paluh ani wah. Syabas. Si Veronica pulang relax. Kabal tah banar bini-bini ani.

Kami pun akhirnya sampai ke sebuah Hotel yang bernama "Hill Tonne". Mun kamu kan mencari hotel ani di London, jangantah dicari. Ku dangar kana rubuhkan sudah bulan lapas. Credit crunch bah. Bisnes inda maju.

"Bah, bawa tia back-pack ah. Tadi menurut message yang ku terima, Buajah Timah tinggal di hotel ani,"ujar si Veronica sebaik saja me-markingkan keritanya.

"Banar ni ah. Mana tau message atu eksen-eksen,"balasku sambil membuka pintu kerita untuk turun.

"Awu banar. Bah turuntah."

Aku pun turun dari kerita kijang si Veronica. Dalam beberapa detik saja lagi, segala persoalanku akan terjawab. Misteri barang dalam backpack ani akan didedahkan jua akhirnya. Tapi sebelum atu tepaksa lah cerita ani besambung dulu haha.

besambung bah...

Posted in: