My Term Break part 9

Kedua-dua tangan Veronica yang tadinya memigang bahu kiri dan kananku mikin menular ke bawah. Mula-mula ke dadaku. Lapas atu ke parutku. Before mikin turun, sampat lagi digelitiknya pusat ku tu. And then mikin turun lagi ke pahaku. Sekali last-last lapas atu dipigangnya... Eh, malu ku membagitau eh. Patutkah aku membagitau kamu apa yang dipigangnya? Karang kalau ku sabut, takut ku kana ban blog ku ani pasal telampau memberahikan. Awubah... Yang dipigangnya atu ibu jari kaki ku. Apa benda yang kamu pikir si Veronica pigang atu? Kuning jua pikiran kamu ani eh.

Sambil memigang & menggelitik ibu jari kakiku atu, si Veronica beteriak-teriak memanggil namaku macam urang kana histeria saja. Lapas atu ditampar-tamparnya pipiku yang kiut-miut ani.

Dan aku pun terbangun. Syabasss, mimpi rupanya tadi atu. Siuk sudah.

"Nyaman eh tidur mu ah. Apa saja kau mimpikan atu kan?"tanya si Veronica sebaik saja aku terbangun dari tidur & mimpikan kedia.

"Anu.. Mimpi kambing betina betalur ku tadi. Yatah dalam mimpi atu ku tunggu-tunggu kambing atu betalur, tapi inda jua mau-maunya,"balasku dengan eksen-eksen.

"Ahhh, padantah batah tidurmu. Rupanya menunggu kambing betina betalur."

Rupa-rupanya sampai sudah kami di London. Ertinya kan tiga jam tah ku tidur atu kali. Inda ku sadar-sadar. Nyaman banar tah tidur ku atu. Mimpi pun nyaman tia jua hahahaha. Syabas.
Jam digital fossilku menunjukkan pukul 5.45pm. Kalau di Brunei masih siang ni. Kan maghrib. Tapi disini, duiiii, hitam melangut tia sudah. Kira malam sudah ni.

Suasana di London pada masa atu busy berabis. Ramai urang yang bepusu-pusu kesana kemari. Inda ku tau kemana tujuan durang atu. Macam kan mengaga urang kawin saja bah. Bas-bas berwarna merah ada dimana-mana membawa penumpang-penumpang yang inda bekerita, penumpang-penumpang yang kan save usin pasal inda mau membali minyak dan barangkali jua membawa penumpang-penumpang yang ada kerita, tapi kerita mainan pulang tu. Sorry ah, bas warna merah ganya ada, bas papal (purple) nada ni disini ani. Miskipun kamu suka papal, tepaksa jua kamu naik bas warna merah tu.

"Ok, malam ani aku turunkan kau di Brunei Hall dulu. At least disana keselamatan mu terjamin "kali". Backpack ani biar tia arahku dulu. Isuk pukul 9.00 pagi aku ke Brunei hall mengambil kau,"kata si Veronica.

"Kau ani, alang-alang sudah backpack atu kau yang menyimpan. Kau saja membagi arah buajah timah bah. Bahapa lagi kau payah-payah kan menyuruh aku,"jawabku.

"Bulih pulang aku saja yang membagi. Tapi kalau kau inda ikut, inda tia kau tau apa barangnya dalam ani kan kan kan?"

Ih, bijak kedia ani eh. Antah susu apa kah diminumnya ani sampai membuatkan ia bijak cemani ani. Tapi banar jua katanya atu, mun ku inda ikut membagi backpack ani arah buajah Timah inda tia ku tau apa isi kandungannya. Karang menyasal seumur hidup sampai inda mau betidur.

Akhirnya si Veronica pun menurunkan aku di dapan Brunei Hall. Inda semana-mana baru ku teringat apa ku bagitau arah si Kamilin tadi. Tadi ku padah arahnya hari Selasa dapan baru ku turun ke London. Ah, pandai-pandai lah ku menjawab karang tu kalau tejumpa ia di Brunei Hall ani.
Lalu, aku pun melangkah masuk ke dalam Brunei Hall tanpa membawa sebarang luggage. Ani baru syabas namanya.

"Milllll!!!!!"tiba-tiba beberapa suara bini-bini beterais melagau namaku sebaik saja aku masuk. Macam ku kenal suara-suara ani.

Nah, besambung tia lagi. membari banci eh

Posted in: