Teenage Angst part 6

previously: si Chris tanpa rasa galat-galatan menceritakan arah geng-gengnya pasal pertemuannya dengan seorang lelaki tua misteri (& bebau hangit) yang membagitaunya pasal kewujudan "Jalan Buntak". Lapas atu ia pun planning untuk adventure mencari Jalan Buntak & kemudian atu dan bertanya arah geng-gengnya yang berminat untuk join.


Setelah batah menunggu sampai basah ketiak di sebalah kananku (ketiak di bahagian kiri karing masih), akhirnya si Garip, si Bub, si Toyib pun menjulur lidah. Kecuali si Damit. Eh? Aku pun menggusuk-gusuk mataku, untuk memastikan masa atu aku inda angan-angan. Tapi setelah ku gusuk sampai merah-merah mataku, masih jua si Damit inda menjulur lidahnya. Si Damit yang sukakan adventure ani, mustahil ia inda mau join.

"Eh, Damit. Mengapa kau inda julut lidahmu?"tanyaku kemusykilan.

"Errr.. Chris, antah ah.. Indaku rasa nyaman hati bah. Kalau masih kedapatan ulih urang kampung cemana? Nada ku mau kana hukum gelitik sampai mati,"balas si Damit.

"Come on lah Damit. Bukannya urang kampung tau jua pasal "Jalan Buntak" atu. Lagipun bukannya batah kitani ke dunia luar atu. Menyubuk sekajap saja. Bah, ikut ah?"

"Sorry Chris... Banar ni, inda nyaman rasa hatiku. Agatah kamu saja."

Lapas ia menjawap atu, ia pun meninggalkan kami tanpa mengucapkan babai. Jangan tah kan babai, flying kiss pun nada bah. Sebelum ia pigi jauh, aku cuba menguyung kedia, tapi lenganku digenggam ulih si Garip.

"Chris, jangantah dipajal. Yatah sudah keputusannya tu,"tagur si Garip.

Sambil tanganku digenggam ulih si Garip atu, mataku masih lagi mengikut jejak si Damit yang makin lama makin hilang dari pandangan. Elah, nada tia si Damit ani mau ikut. Walaupun ia malar menyaya aku, tapi ia atu tah best friend ku numbur satu ni. Dari damit sampai ke basar, apa saja gerenti kami buat sama-sama. Main carah sama-sama, mengurat bini-bini sama-sama, melepak sama-sama, mengajuti buajah lauyah sama-sama, menggelitik Paji Jumat sama-sama & sebagainya. Ke jamban & tidur saja inda sama-sama. Mun atu pun sama-sama bah, galak usulnya tu. Talur, emo tah ku pulang nah pasal si Damit inda ikut ani.

Tapi mun miatu sudah keputusannya, apa bulih buat. Heys....

"Boo!!"tiba-tiba ada seseorang mengajuti aku dari belakang. Kebeliangan ku tarus ulihnya sampai terabah ke tanah. Talur kali. Siapa lagi ni mengajuti di saat-saat aku emo ani.

"Eh Chris, inda kan cematu pun kau tekajut? Haha"ujar urang yang mengajuti aku atu. Siapa lagi kalau bukan si Damit. Inda pandai beranti menyaya aku ia ani.

"Baie kau Damit haha!! Bahapa kau datang balik ani?"tanyaku sambil berdiri semula.

"Tadi atu aku eksyen-eksyen inda mau ikut saja haha. Gullible jua kamu ani eh. Of course lah aku mau ikut. Ani si Damit bah ni. Inda kan kamu inda kenal? haha."

Ceh, si Damit ani. Ada-ada saja. Menyaya urang tah ganya. Emo ku sudah tadi. Sudah nyangku tadi kan, ia ani kalau ada adventure jarangkan inda mau ikut.

Lapas atu pun mengeluarkan map yang dibagi ulih paji misteri atu dan menunjukkan arah durang semua.

Posted in: