The Detective Returns - Part 9

Previously: Akhirnya selapas dimanis-manisi ulih Detective Zack, kidnapper si Suraya berubah fikiran dan melapaskan si Suraya.

"Memanglah hujan masih. Pasal masa ani si Bob menangis pasal happy. Happy pasal kau mau berubah sudah,"sampuk si Suraya bila menyedari yang aku payah-payahan kan menjawab soalan yang dikemukakan ulih laki-laki atu. Sesungguhnya soalan yang ditanyanya atu payah dari soalan A-Level Physics. Sebab atu inda ku tejawab.

Bila mendangar jawapan yang dibagi ulih si Suraya, laki-laki atu tersenyum. Senyuman yang dibaginya atu inda berapa manis. Pahit-pahit masin adalah. Pasal giginya rumpang sebuting. Yatah akibat malar makan ruti paun inti kaya tu nah. Mua karas sudah. Tapi ulih kerana giginya rumpang sebuting, hilang kekarasan mukanya sebanyak 10 persen. Overall, masih karas lah muanya.

Entah inda semana-mana beranti tia hujan ah. Bila menyedari yang hujan sudah taduh, makin senyum tia lagi laki-laki atu sampai menampakkannya giginya yang bukan saja rumpang tapi berwarna oren. Maybe bagas makan kaya atu kali, yatah giginya warna oren atu.

"Eh, bahagia banar jua kau ani sampai senyum-senyum?"tanya ku ke arah laki-laki atu walaupun aku sebenarnya tau apa kan dijawapnya.

"Memanglah aku senyum. Cuba kau liat. Hujan taduh sudah ah. Ertinya si Bob beranti menangis sudah tu,"balasnya.

"Awuwah banar jua. Bijak kau ani eh. Bangga indungmu ada anak yang bijak bistari macam kau ani."

Laki-laki atu pun berdiri semula dan mengaga ke arah aku & si Suraya dengan perlahan-lahan. Aku pun menyuruh si Suraya bediri di belakangku untuk make sure laki-laki atu inda dapat mengapa-apakan si Suraya lagi. Mana lah tau segala apa yang dicakapkannya tadi atu hanya sandiwara semata-mata.

Laki-laki atu pun beranti lebih kurang 1.06 meter di dapanku dan mula bersuara,"sebelum aku berambus dari sini aku mau bini-bini belakang mu atu mengakun yang ia yang melanggar si Bob."

Memajal jua si Bobnya ani eh. Cubatah tanya pasal si Ali kah, si Abu kah, si Ahmad kah, si Achai kah. Ani si Bob saja. Indakan besanang.

"Kau ani ah! Udah nyangku dalam se umur hidupku inda ku pernah melanggar urang pakai keritaku!"teriak si Suraya yang tiba-tiba keluar dari belakangku.

"Urang? Siapa cakap kau melanggar urang?! Si Bob atu KUCING ku bah!!"balas laki-laki atu.

Si Suraya terdiam bila mendangar siapa si Bob atu sebenarnya. Aku pun tediam jua. Bangang pun ada. Macam palui-paluian ada jua rasanya. Indakan pasal kucing mati pun sanggup sampai menculik & membunuh urang. Eksyennya kali ni laki-laki ani.

"Kau tau? Si Bob atu ku jaga selaginya damit bah tu. Yatah kawanku selagi ku darjah anam bah tu. Sejak ia kana langgar inda ku bekawan lagi bah! Lonely ku bah ni!"ujar laki-laki atu dengan penuh emosi.

Gila kali anak ani. Bekawan sama kucing. Barangkali ia ani loner kali bah. Nada urang mau bekawan sama ia, so ia pun bekawan sama kucing. Kesian... Tapi yang calinya kan, se-ikung kucing jua ganya kawannya ani. Jangan-jangan kucing-kucing pun banci ia kali bah. Si Bob atu tah ganya mau jadi kawannya kali tu. Kesian.... Kucing pun inda mau bekawan sama ia... Loner banar tah tu sudah.

"Oh baru ku ingat! Last month aku ada telanggar kucing bulu oren. Si Bob mu kah tu? Kalau atu si Bob, aku banar-banar sori,"si Suraya tiba-tiba berkata.

"Jadinya, banar tah kau yang melanggar ia tu. Heys.... Inda apalah.... Its ok.... Aku maafkan kau sudah,"jawap laki-laki atu dengan sedih. Lapas atu ia pun bejalan meninggalkan kami tanpa mengucapkan babai.

First time ku menyaksikan ni scene macamani ani. Adakah patut sekadar kucing mati pun kan sanggup bebunuh-bunuh. Heys.... ada-ada saja bah. Indakan besanang.

Bila laki-laki atu hilang dari pandangan kami, aku pun call si Ratna untuk membagitau yang aku sudah tejumpa si Suraya. Lapas atu aku sama si Suraya pun balik ke rumah masing-masing dengan pakaian yang masih basah pasal hujan tadi. So, tepaksa lah kami cancel ke Hj Gillien's Cafe. Indakan ke Hj Gillien's Cafe dengan pakaian kami yang macamani ani. Kacau eh, kan minum teh tarik free tah ku tadi ni!!

The End

Posted in: