The Detective Returns - Part 8

"Bui, aku ada satu soalan. Kalau kau bunuh bini-bini ani, macamtah kawanmu si Bob atu dapat hidup balik? Useless jua tu. Lapas atu kana jail pasal kau membunuh urang. Menyusahkan dirimu jua tu,"aku mula bekurapak dengan harapan dapat mengubah fikiran laki-laki atu.

Laki-laki atu terdiam sekajap. Lapas mendangar soalan ku atu, mukanya menjadi confuse. Macam inda tau apa kan dibalasnya. Nampak gayanya psychological warfare ku hampir-hampir berjaya. Ia ani sebenarnya inda jahat ni. Ganya terlampau mengikut perasaan. Telampau emosi. Macam kanak-kanak emo bah. Sikit-sikit slit wrist. Putus cinta, slit wrist. Kana marahi cikgu maths, slit wrist. Meliat cerita sedih, slit wrist. Kalah main guli, slit wrist. Kana gigit nyamuk, slit wrist. Apatah tu. Emo tah perasan kamu tu? Baik tatak selajur tangan ah. Inda alang-alang. Nah, emosi tia pulang jua aku ani. Syabas.

"Dangar tah cakap ku ani bui. Bedusa bah membunuh urang ani. Baik pulang kau membunuh lipas-lipas sama tikus-tikus yang bekeliaran arah punduk di dalam atu tu. Ada jua gunanya,"aku beceramah macam si-taie. Macam ustaz sudah bah.

Inda batah atu, hujan pun turun barai-barai. Eh, kacau eh. Hujan tia jua. Mudahan tah arah rumahku inda hujan. Lupaku membangkit jamuran ku tadi. Hopefully amah mamaku membangkitkan jamuran ku atu. Atupun kalau amahku atu inda meliat Astro. Awu, kalau meliat Astro, rumah kana bomb pun masih jua palak-palak meliat rancangan Astro atu kali.

"Kau tau apa maksudnya hujan ani bui?"aku bertanya arah laki-laki atu yang masih tediam dari tadi.

"A...Apa.. maksudnya?"balasnya. Baru tah besuara. Atu kan emosinya tadi.

"Ertinya disekeliling kitani ani ada roh bagas urang mati. Jangan-jangan si Bob kali. Yatah ia menangis meliat tindakan mu ani. Hujan pun turun bila ia menitiskan air mata"ujarku. Eseh, atu baru menipu aku ah. Adakah mengaitkan roh sama hujan. Inda apalah. Last resort bah udah tu. Mana tau tipu-tipuanku ani dapat brainwash laki-laki atu.

Pisau ditangan laki-laki atu pun telapas dan tegugur ke tanah. Ia pun melapaskan si Suraya dari genggamannya & kneeling down. Si Suraya mula berlari mengaga aku sebaik saja ia kana lapaskan. Menjadi jua rupanya tipu dayaku atu.

"Sorry Bob kalau aku buat kau menangis. Aku mengakun aku membuat silap. Ani sadar ku sudah. Bah adangtah menangis. Basah bajuku ulihmu ni. Lagipun ceramin keritaku bebuka tu. Masuk tia aying kedalam karang,"laki-laki atu tiba-tiba becakap. "Eh, mengapa hujan ani lakat? Ku suruh sudah ia beranti menangis udah,"sambungnya dengan membagi satu soalan cepuemas arah ku.

Aduh. Apa baik ku jawab ni. Susah eh macamani ani.

Posted in: