The Detective Returns-Part 3

Si Ratna pun keluar dari keritanya. Jantungku dup dap dup dap udah ni. Awkward jua rasaku pasal yang dua-dua ani bagas ex ku. Dua-dua ani relatives lagi tu. An incovenient coincidence ni eh. Kalau ku balik, inda jua dapat. Gerenti jua bertembung sama si Ratna masa on the way ke kerita ku. Ah, stay sajalah. Bukannya membawa maut jua kalau ku stay.

Langkah demi langkah si Ratna kian menghampiri kami. Aku masih memikirkan apa yang patut dicakap. Bayangkan bila si Ratna mendapati aku ani ex si Suraya, dan si Suraya mendapati aku ani ex si Ratna. Bukannya apa tu aku atu. Aku takut durang cat fight. Karang kalau durang cat fight, tepaksa tah ku jadi refferee. Aku mana mau jadi refferee. Kalau jadi penonton mau ku. Astah... Jauh jua aku melarat ani... Datang tia lagi angan-anganku atu..

"Eh, Zakaria!"ujar si Ratna yang selalu tebiasa memanggil aku Zakaria, nama panjangku.

Si Suraya terbangang bila si Ratna menagur aku. Lalu, ia pun betanya,"Eh, kenal kau si Zack ani na?"

"Mistilah aku kenal. Kawan ku masa di Uni ni dulu si Zakaria ani!"balas si Ratna.

Phewwww!! Baik jua disabutnya "kawan". Mun disabutnya "ex" tadi, syabas tu eh.

"Ahhh... Ia ani kawanku sekulah jua dulu ni. Kelurusan kami ani tejumpa disini, yatah becerita-cerita kami sekajap,"ujar si Suraya lagi.

Nah, baik jua dua-dua menyabut aku sebagai kawan. Selamat sejahtera lah ku ni buat sementara ani. Lapas atu kami pun mempelawa si Ratna duduk sama-sama kami. Ulih kerana terlalu boring kami pun bemain London Bridge disana. Selain main London Bridge, kami main datuk harimau, main carah duduk, main carah tapuk, main carah kaki dan macam-macam lagi lah. Tapi eksyen ku pulang tu. Gila, bari malu kali ah urang-urang dewasa macam kami ani main macamatu di khalayak ramai, walaupun ari atu inda ramai urang ke pantai.

Mostly kami becerita-cerita ganya lah. Tapi kadang-kadang diam ku ganya. Pasal durang dua atu kadang-kadang becerita pasal topik yang inda ku tau-menau. Pasal artislah, pasal drama korealah, pasal p2f lah, pasal tudunglah, pasal shopping lah dan lain-lain topik-topik yang selalu dibincangkan ulih bini-bini. Topik sensitif ada jua lah. Tapi malas ku menyabut. Karang kana ucap tia aku pervert.

Dan ulih kerana kami inda membawa makanan, parut kami pun terasa lapar. Maka kami pun planning kan pigi ke Hj Gillien's Cafe. Tapi ani arah cawangan Muara. Baru buka bah, yatah mau jua merasa makanannya. Lagipun ada free teh tarik kata si Suraya. Tapi secawan pulang ganya tu. Inda apalah. Janji free.

"Eh, tunggu dulu eh. Aku ke jamban sekajap,"kata si Suraya tiba-tiba.

So, ia pun ke jamban lah. Tapi sebelum atu disuruhnya kami menunggu di kerita masing-masing. Maka kami pun ikutkanlah cakapnya atu. Menyusahkan si Suraya ani. Cubatah suruh saja kami menunggu di Hj Gillein's Cafe. Ani batah tia lagi menunggu. Baik jua ia ani lawa, mun inda mana ku menunggu ni.

Tunggu punya tunggu, alum jua nampak tubuh si Suraya ani. Lalu, aku pun keluar dari kerita dan mengaga si Ratna.

"Ratna, batah jua si Suraya di jamban atu. Kan sejam setangah sudah ni. Kalau beria, mana ada batah sampai macamani ni. Me beria paling batah pun sampai 20 minit ganya. Inda me tau kamu bini-bini ah.."ujarku arah si Ratna.

"Eh barigali you ani eh! You punya batah beria pun kan dibagitau. Agatah you checkkan di jamban atu. Malas me kan keluar,"balas si Ratna dengan manja.

"Mengapa pulang me? You lah. You bini-bini. Indakan me masuk jamban bini-bini. Karang kana ucap pervert."

"Eh, awuwah. You laki-laki jua hehe."

So, si Ratna pun keluarlah dari keritanya dan pigi ke tandas awam yang ada di pantai atu. Lima minit lapas atu, si Ratna pun keluar begagas mengaga aku. Raut wajahnya menunjukkan kerisauan. Aku dapat merasakan ada perkara buruk terjadi arah si Suraya. Di tangan si Ratna atu ada sesuatu yang dipigangnya. Bentuknya macam wallet.

"Zack, si Suraya nada arh jamban ah!!! Walletnya tejumpa ku ampai-ampai di lantai jamban atu!!!"kata si Suraya dalam keadaan panik sambil memigang kedua-dua tanganku. Matanya mula belaing sudah.

Eh magic jua si Suraya ani. Indakan si Suraya meninggalkan kami macamatu saja. Lagipun keritanya masih disini. Inda patut ia jalan kaki ke Hj Gillien's Cafe. Kalau ia bejalan kaki ke sana pun, macamani ia kan membayar. Walletnya ampai-ampai arah jamban. Hmmmmm....

Read More

The Detective Returns-Part 2

Previously: Ulih kerana terlampau keboringan di rumah, Detektif Zack pigi ke pantai buat kali pertamanya lapas enam tahun inda pernah kesana. Masanya angan-angan kan si Ratna, ada urang menagur ia.

"Waalaikumsalam. Eh..."aku menjawab salam yang diucapkan ke arahku sambil tergamam meliat urang yang menagur aku atu. Rupa-rupanya si Suraya, ex-girlfriend ku masa di sekulah dulu. Nah, kedapatan tia ex ku seorang lagi. Sasak ku penulis cerita ani. Semua private life ku di expose kannya.

"Eh, mengapa tediam ani? Ani Suraya bah. Ingat?"tanya si Suraya, sambil membuka sunglassesnya. Wah, lawa lakat ia ani.

"Ingat eh. Apa pulang inda ingat..."balasku sambil kontrol macho.

Lapas atu cerita-cerita lah kami. Yatah perkara biasa yang selalu dibuat ulih urang-urang yang batah sudah inda bejumpa tu. Topik yang diceritakan macam biasalah, pasal keraja, pasal kawan-kawan dulu, pasal cikgu-cikgu yang pernah mengajar kami, pasal kenangan zaman sekulah dan sebagainya. Baik jua ia inda betanya pasal love life ku masa ani. Mun inda awkward pulang rasaku karang.

"Bukan jua bah Sur. Bahapa kau ke pantai ani?"tanyaku, mengubah topik perbualan.

Si Suraya pun menjawab, yang ia kan bejumpa cousinnya. Oh bejumpa cousin.. Pikirtah bejumpa boyfriend tadi. Single tah kali banar ia masa ani. Ada harapan ni heheh. Nah, datang tia gatal ku atu.

"Aku sama cousinku ani andang suka ke pantai,"si Suraya membagitau arahku, walaupun sebenarnya inda ku betanya.

"Bahapa? Sun-tanning kamu?"balasku.

"Bahapa pulang kan sun-tanning di Brunei ani. Silap-silap sun-burning ada pulang!! Mun paham bisai!"ujar si Suraya sambil tekidum.

Lapas atu dibagitaunya lah arahku, yang ia sama cousinnya atu suka me-rileks-kan minda dan menghilangkan stress di pantai ani every week. Tapi kan, aku datang kesini, inda jua mau rileks utakku. Makin banyak angan-angan ada pulang. Tapi angan-angan ani kira me-rileks-kan utak jua lah. Next week datang ku lagi kesini. Dapat jua angan-angan. Sambil-sambil atu bejumpa ku jua si Suraya.

Sambil-sambil menunggu cousinnya datang, kami pun bejalan ampir-ampir coast atu sekajap. Panas bah Brunei ani, yatah inda kami tahan. Hangus kulit ni mun batah-batah bejamur. Bukan lagi hangus, ada cair badan kali ulihnya. Yatah akibat global warming ni. Please do something to stop global warming. Pasal kalau inda di-stop, Brunei ani makin panas. Eh, beceramah tia pulang aku ani nah.

On the way balik semula ke hut yang kami duduki tadi, sampat lagi si Suraya memutik she sell tu. Eh, salah... Bukan she sell, sea-shell!! Membari confuse bah she sell sama sea-shell ani. Mun exam oral English, kana putung markah sudah tu.

Alum batah kami duduk, si Suraya pun beterais sambil menunjuk-nunjuk,"Tu nah cousin ku sudah datang!"

Aku pun meliat ke arah yang ditunjukkannya atu. Ai? Kerita Toyota Vios. Macam kenal. Sekali ku liat license plate nya. Memang aku kenal kerita ani. Cousin si Suraya ani.... Si Ratna kah?

Read More

The Detective Returns - Part 1

Gila, lama ku inda membuat cerita pasal Detective Zack ani haha.

***

Usin pembari Encik Jaini semakin hari semakin bekurang. Menyasal ku overspending. Mengapa tah aku inda menyasal awal-awal. Inda jua ku overspending. Ani sudah kurang, barutah kan menyasal. Ataupun cubatah perasaan menyasal ani inda wujud dalam dunia ani. Inda jua ku susah hati kan. Bukannya apa tu aku susah hati ah. Karang mun ku inda beusin, macamana ku kan membayar astro ku? Payah tia lagi karang meliat EPL. Syabas lah.

"Eh, Zack. Angan-angan kau kah?"tiba-tiba mamaku menagur aku. Terkezut ku eh mama ku ani. Sikit lagi ku tekantut.

"Kita rupanya ma. Mana ada ku angan-angan. Aku meliat kipas di atas atu. Bisai bah,"balasku eksyen-eksyen.

"Kipas yang behabuk atu kau ucap bisai? Jangantah kan eksyen arah mama. Tau mama tu bila kau angan-angan. Bah, mama kan ke bilik dulu. Jangan banyak angan-angan dih!"

Nah, tekana ku sekali. Yatah payah mun tedapat mama bekeraja lawyer ani. Inda dapat ditipu. Entah berapa ramai sudah mua penipu dijumpainya arah mahkamah atu. Biasa sudah tu ia meliat macamana usul mua penipu. Sesudah mamaku hilang dari pandangan, aku pun menyambung angan-angan ku balik.

Tapi malangnya inspirasi kan be-angan-angan atu hilang tia jua. Kacau bah mamaku atu, siuk sudah aku angan-angan tadi. Sebenarnya be-angan-angan ani inda dapat dikacau. Kalau dikacau, inda tia lagi dapat disambung lapas atu. Yatah aku pun mengambil keputusan untuk bejalan keluar. So, aku pun keluar rumah, mengaga kerita Honda Jazz ku, buka pintunya, hidupkan enjinnya, duduk, tutup pintu, menurunkan handbrake, tukar gear D, pigang stering dan mula menakan minyak. Wah, detail banar jua ku membagitau arah kamu ani.

Mula-mula aku atu planning kan lepak-lepak arah Hj Gillien's Cafe. Tapi balik-balik jua sudah kesana. Kelanguan jua. Lagipun kalau ku kesana, keluar tia usin ku karang pasal minum teh tarik balik-balik sampai 20 galas. Last-last aku pun decide untuk pigi ke pantai Berakas since aku batah sudah inda ke pantai. Paling last aku ke pantai, masa enam tahun lalu. Si Ratna yang membawa aku. Kami kesana kan meliat sunset. Gila, kenangan terindah eh. Kalau lah kami masih couple sampai sekarang.. Heys... Menyasal tia ku pulang nah..

Sesudah sampai, aku pun meletakkan keritaku. Hari atu inda berapa ramai urang. Dapat dihitunglah. Lapas parking, aku pun keluar lalu duduk arah hut yang inda berisi. Di sebalah ku ada segolongan remaja yang sedang hangout sambil menikmati suasana. Makan-makanlah, ketawa-ketawa lah, becubit-cubitan lah, main frisbee lah dan beberapa aktiviti lain yang biasa dibuat dipantai. Teringat tia ku nah, masa zaman sekulah ku. Masa hangout sama kawan-kawan atu tah yang paling berharga. Becali, begosip, buat pranks, buat homework last minute, lepak di kantin, lepak di jamban... Rindu ku zaman sekulah atu eh.

Thank god ada facebook. So, adalah kawan-kawanku yang masih dapat ku contact. Masa ani sorang-sorang sudah sibuk dengan komitmen masing-masing. Bukannya macam dulu. Inda banyak kan diingaukan. Yang kan diingaukan boyfriend/girlfriend, homework sama exam ganya.

Di pantai ani teringat tia ku jua pasal kes Encik Jaini. Talur eh Encik Jaini atu. Adakah urang asing diucapnya makhluk asing. Syabas banar ia atu. Selain teringatkan kes Encik Jaini, teringat tia ku jua masa si Ratna membawa aku kesini kan meliat sun set. Balik-balik jua ku teringatkan pasal si Ratna ani.

Masa atu summer break. So, kami UK students pun balik ke Brunei untuk becuti kan bejumpa family & friends. Yatah masa cuti atu si Ratna membawa aku ke pantai Berakas kan meliat sun set. Sebagai seorang boyfriend yang mithali, aku pun ikut saja request nya atu. Kenangan terindah banar eh.

"Assalamualaikum. Zack, is that you?"tiba-tiba ada urang membari salam arahku. Aku pun menoleh ke siring untuk meliat siapa.

Read More

Sorry for the lack of updates

I've been busy lately. Nada idea bernas muncul for posting new stories. At the moment probably, my boredom bin will be at a break for a while hehe, since I need to create a website for the MBSoc society which is still under construction. At the same time I need to prepare a presentation due nexw week and slideshows for the MBsoc meeting this wednesday.

I am really sorry to dissapoint my loyal readers who kept viewing my blog daily. But dont worry, once aku be-idea berabis, betimbun tu post ku karang hehe. Insya-allah.

Read More

Uni life

Si Ai request aku untuk update/share my life di Kent ani. So, Ai, yatah kan ku ceritakan ni. Ok... Where should I start...? Bah, aku start dari 1st malam raya di Kent lah. Brunei alum lagi raya tu masa atu hehe. That night kami kana invite untuk datang ke rumah family Brunei: Abang Mahri, Kaka May & anak-anak. Disana kami betakbir & makan. Ramai jualah urang Brunei datang masa atu. Macam di Brunei pulang rasanya hahaha.

First time inda beraya sama family, memang syahdu rasanya. Yatah ramai lah bini-bini betangisan malam atu. Apatah lagi bila mendangar takbir. Tambah syahdu tia lagi. Liat saja tah photos ku arah facebook atu. Semua gloomy bah.

Time raya atu masa first week of lecture tu. Yatah nada kerasahan raya bah usulnya haha. Masa ku menaip ani pun inda ku tau hari raya ke berapa sudah ni haha. So far lectures ku nada problem lah. Tapi aku struggling lah sedikit arah one of my modules namanya Visual communication. Assignmentnya pun challenging jua. Oh just to remind you guys, aku ambil Multimedia Technology and Design. Modules ku ani macam-macam. Ada maths, ada programming, ada art, ada media studies, ada website design, ada photography and etc. Yatah visual communication ani more to art and media studies. And aku nada background arah those two subjects. Tapi insya-allah bulih lah ku cope tu nanti. Misti optimist bah.

The other modules Ok lah. So far nada complain. Lectures nya pun so far alum ada yang membuatkan aku mengantuk hahaha. Apart from visual communication, aku belajar HTML, C++ and maths. Alhamdulillah aku inda struggling arah those modules.

Dari lecture ke lecture I need to walk. Inda jua jauh lah dari rumahku. Paling jauh pun macam dalam 10 minutes ganya. On Monday aku ada four hours of lectures. Tuesday ada 2 hours of lectures. Wednesday ada 3 hours. And on Thursday 1-2 hours. Friday aku nada lecture!! So kira aku free on Friday lah. Dapat jua ku sembahyang jumat.

Ok, enough about lectures. Apa lagi ah kan ku share ah... Oh, I wanna share experience ku masa minjam buku di library. Syabas lah ni haha. Aku atu minjam dua buku dari library wah. So aku ada tempoh one week lah untuk membalikkan semula buku atu. And then 3 days later, aku ada receive email dari my uni library. E-mail atu state that one of my books was overdued. Aku hairan kan, sekali ku check lah my issued books receipt... Rupanya yang sebuting atu 24 hours loan ganya!! Pikirku dua-dua buku one week loan!!Syabas!! Kana fine lah ku. "MURAH" lah fine nya ah. 25 Pounds!! GILA!! Tapi nda apalah... Jadi pengajaran untukku dan untuk kamu lah yang maybe alum pernah minjam buku di library haha. Yatah... Lain kali liat resit! Hahaha

Ok... What else.... Oh tadi ada Brunei-Malaysia Kent society punya gathering. I was nominated jadi webmaster. Aku seorang ganya nominated. Boring nada contender ah hahaha. Sorang-sorang malu-malu kan speak-up tadi. Hopefully nanti, ada lah contender. Mun nada challenger, automatically jadi webmaster tah ku tu. Mun ada, tepaksa tah ku prepare speech tu.

Apa lagi ah? Haha antah eh. Bah lain kali tah ku cerita lagi. Aku ani sebenarnya kan membuat assignment. Sekali last-last mengadap laptop jua haha. Syabas!!

Read More

Drama Minggu Bahasa

While I was browsing my HD, I came across with the script that I have made for the 2007 MS Inter House Drama competition. So I thought I wanna share it with you guys. Alhamdulillah, kami, the Hulubalang house managed to win 1st place. Credit to all of those who have particpated last year (Hafiz Alidi, Atiqah adinin, Rasyidah, Nurhafizah, Rifaie, Izyan, Afif, Sam, Fatin, Izyan, Fakhrin, Amir, Kok Hui, Haikal, Boon Zhang). Without you guys mana kitani manang tu =) Cubatah kana rakam performance kitani hari atu, dapat jua diliat balik hehe.

***
Kemana Hilangnya Budi Bahasa

Sipnosis: On the day harry Putra kan kraja, kritanya tiba-tiba rusak.. so.. tepaksa ia ke bus stop, pakai bus ke officenya.. iatah starting dri sna ia bejumpa macam-macam jenis manusia…

Scene 1:

Harry Putra, bukan Harry Potter ah, dangar bisai-bisai HARRY PUTRA, seperti biasa meng’hensem’kan dirinya sebelum pergi bekerja. Pada hari itu, beberapa insiden yang berlaku ke atasnya telah menyedarkannya betapa ‘kroniknya’ masalah budi bahasa pada masa ini.

(Harry Putra, grooming himself, before kraja)

Harry Putra(HP): Ok handsome sudah ni, macam Johnny Depp sudah ni!! Ani baru semangat kan bekeraja. Sayang, abang jalan dulu ah!! (inda sadar begnya tinggal)

Wife: Bah, bisai-bisai jalan atu.. Eh, begnya tinggal.. Bang ni beg kita tinggal ah!!

HP: Astah!!Baik jua ku alum bejalan..

Wife: Iatahnah, mun mua macam Johnny Depp tapi pelupa useless jua kn, inda tia hensem.. Nah beg kita ah..

HP: Awudey.. bah bisai-bisai d rumah atu ah.. Babai!!

(Wife melambai tangan sambil tersenyum)

(Maci Joyah sedang menyiram bunga)(Amahnya jua ada disana)

HP: Selamat pagi maci joyah! Bahapa kita tu?? Menyiram bunga??

Maci Joyah(MJ): Nada ih, memandikan gajah ku ni!! Awu menyiram bunga jua ku ni!! Tau sudah ditanyanya lagi!!Nda lagi membagi salam tu!! Cemana kan tu?(Inda sadar tesiram amahnya)

HP: Astah marah tia pulang.. bah.. bah.. assalamualaikum, maci joyah, maci ooooo, maci.. Tuuuu.. memandikan amah kita?

Amah: Waduh bu!! Mengapa saya disiramin?!

MJ: Eh, bahapa kau dibawah atu?(masih lagi menyiram amahnya)

Amah: Waduh, gawat nih!! Itu pun masih mau ditanyain, saya ini bukan bunga bu!!

MJ: Eh, bukan bunga rupanya kau ani, padantah pandai becakap.

Amah: Aduhh.. semakin diomongin semakin saya disiramin, baik saya pergi aja!! I quit!!

MJ: dimana ku beranti tadi ani... ah!! awu taulah aku ani janda hot, ramai tia laki-laki kan mengurat kediaku!! Mun kan mengurat kediaku, bagitau saja straight forward bah, nda jua payah kan betapuk-tapuk!!

MJ: btw lain kali jangan panggil kediaku maci joyah, panggil saja MJ!!

HP: Laillahailallah, ucapnya tia pulang kan mengurat.. eew..eww..

MJ: Malas ku kan melayan laki-laki buaya darat ani, hmphh… (Beredar)

HP: Menagur ucapnya mengurat.. salamku inda dijawabnya.. heyyyy… mana hilangnya budi bahasa arahnya ani(terus menghidupkan kretanya)

HP: Rusak tia jua krita ani.. kalau kan diusai takut ahir sampai ke ofis.. kalau MC, rugi jua inda dapat meliat c Sally sekretari bos atu.. Pakai bus sja kli, sekurang-kurangnya dapat jua ku reduce CO2 emission..

HP: sayang, krita tani rusak tu!! Abang ke bus stop ni!!

Wife: bah mun ada bini-bini lawa d bus stop atu jangan ditagur!! liat saja!!

HP: elah rusak projek..

Scene 2:

Two guys, ramli sarip look alike n a hip-hopper duduk di kerusi, padahal di siring during atu ada pregnant woman n maci tua diri-diri.. Lalu apa lagi as a mr.nice guy , Hp pun menagur durang atu…

HP: Orang muda-muda sekarang ani, ehhh inda tia pandai kan bebudi bahasa..Excuse me, sory ah, inda kita meliat kah bini-bini pregnant sma maci diri-diri disana atu?? Utamakan orang yang memerlukan dulu…

Ramli Sarip(RS): Apa excuse me, excuse me ah?? Ingat namaku kah tu?? Apa kuasa mu sampai berani-berani kan menagur aku?? Lagipun durang nda jua bunyi-bunyi kan duduk!!

HP: Bukannya apa tu durang atu, mua mu atu telampau karas bah, iatah inda tecakap..

RS: apa nyamu!! Aku yg malar facial ani kau ucap karas!! (Sambil menarik baju HP)

HP: Jangan kau macam-macam, aku kenal mamamu!! Karang ku report karang!!

RS: Ah, mamaku?(Takut dan lari)

HP: Mua saja karas tapi penakut.. Ani lagi seorang.. hep-hop jua ia ani.. wang, wang, oiii wang!!

(hep-hop guy terkejut)

HP: Bah maci, ka duduk tah kita..

Pregnant woman n maci: Terima kasih..

(alum batah lapas atu, bas pun datang...)

Scene 3:

HP: Mana si irwansyah ani, janji kan datang pukul 1, ani pukul 1.01 minit sudah ni.. ani janji pencita wanita namanya ni!! Baik tah di call kli eh..

HP: Halo!! Irwansyah, di mana kau kan!!

Irwansyah(I): owh, on the way ku ni, kan kejamban..

HP: karang tah ke jamban atu.. makai jamban d restaurant saja..

I: Eh nda tia siuk klw makai jamban d restaurant.. kedengaran tia karang aku menyanyi pencinta wanita..

HP: Eh, ada-ada saja kau ani eh..

(Tiba-tiba sorang lelaki menepuk bahu HP dari belakang)

I: Bah, jadi??

HP: (terkezut) eh, laju jua??

I: Express kli ah.. Bah lakastah makan ah!!dimana??

HP: arah penyangat jolly

I: penyangat jolly?? Dimanakan tu??

HP: jollybee..

I: ahhhh.. nda ku mau eh, arah Restaurant HJ Gilin saja. Ni ampir sudah ah..

HP: bah manasaja tah

(Duduk di kerusi, lalu memanngil waitress yg mcm malas usulnya)

I: Excuse me, excuse me!! Mendangar kah inda waitressnya ani? Ani kan ampirnya

(Irwansyah lalu berdiri menghampiri c waitress)

I: excuse me, kami kan mengorder makanan ni!!

Waitress: pak, nggak usah jerit-jerit!! Napain bapak panggil saya excuse me, itu bukan nama saya pak!!

I: Waduh, saya pula yang dimarahin.. Eh, mengapa keluar cakap indonku ani?? Bah, bah kami kan mengorder makanan ni..

(Waitress marah-marah sambil take order)

HP:Eh, macam kenal kau ani, bukan kau ani amah maci joyah kan?

Waitress: Bapak.. kerja saya disini bukan mau jawab soalan.. jangan buang masa saya pak!! Cepatin, order makanannya!!

I: Mengapa sih, kamu marah-marah? Kok bapak Harry mau tanya kamu aja. Napain kamu nggak keren?? Ehhh, datang lagi cakap indon ku ani.

HP: Awueh, pemarah jua si manis ani eh.. bah, bah..Inda payah ribut-ribut.. Martabak udang satu sama teh tarik Italy

I: Aku cucur sikoi sama teh tarik tanpa susu

(Waitress beredar)

HP: Cematu pun bulih kana ambil kraja kh?

I: Kok ceweknya nggak tau budi bahasa sih.. eh, datang tia lagi cakap indon ku ani..mun cematu sikapnya bah, awu, lari customer..

Scene 4:

I: Bah, banar ni inda mau aku mengantar??

HP: Biar tia, ampir jua ganya ni bus stop ani

I: Bah aku jalan dulu ah!!

(Lagu irwansyah dimainkan)

HP: Lagu ani lagi!! Majal banar, dari mana datangnya kan?

(HP berjalan ke bus stop yg berhampiran, batahhhh ia menunngu.. sedang ia menunggu.. ada tia c ramli sarip datang sambil membawa pisau)

Ramli sarip(RS): Hoi kau, jangan lari!!

(HP lari. scene bubut-membubut. Last-last HP terabah inda dapat belari)

RS: Aku atu kan minta maaf!! Napa kau lari?

HP: Kau membawa pisau atu mengapa?

RS: Ah, bagas ku mengupas epal tadi, lupa ku menaruh di dapur. Mana ku sadar ni tebawa masa ku bejalan ani, sekali teliat ku kau, apalagi kan minta maaf lah ku.

HP: Cakaplah awal-awal, ani mengalih ku pulang nah.. silap-silap bulih appendix ni.

RS: Appendix? Apa kan tu?

HP: Inda ku tau jua, kencing manis kali.

RS: Sebenarnya aku banar-banar rasa bersalah. Aku inda patut kurang ajar arah mu tadi.. Sambil ku mengupas epal atu meliat ku ceramah di tv, lapas atu insaf ku tarus eh.

HP: Eh rock-rock pun suka mliat ceramah jua kah?

RS: eh kau ani... mliat, mliat jua.. janji rock!!

HP: Alhamdulillah, baik sudah kau minta maaf atu tu..

RS: Eh, mun kau menunggu bas batah lagi ni, maritah aku mengantar.

HP: bekerita kau kan?

RS: dont worry!! aku manggil driver ku!!

HP: Eh, kaya jua ramli sarip ani.. berdriver lagi tu..

Scene5: (home)

Harry Putra pun sampai kerumah..

HP: Bah terima kasih ah mengantar aku ke rumah ah, assalamualaikum!!

RS: waalaikumsalam!

HP: Eh, yang bahapa kau bekabun malam-malam ani?

Wife: Eh, malam sudah rupanya ni, pikirku siang lakat.

HP: Mengapa kau yang? Galap-galap cemani kau ucap siang?

Wife: eh siapa tu bang yg mengantar kita balik tadi ah?

HP: Ihh, pandai tia kan tukar topik, woooo..

Wife: Yihhh.. abang ani eh.. Jahat!!

HP: haha, awudey.. c Ramli sarip mengantar abang balik..

Wife: Eh muda jua ramli sarip atu?? Prasanku tua jua sudah

HP: sayang ani.. Mun paham bisai..

Wife: Napa ni macam stress-stress ani?

HP: Inda.. aku memikirkan pasal satu isu ani..

Wife: Isu apa tu bang??

HP: cemani saja nah aku kan betanya arah sayang, budaya timur ani selain kaya adat dan tradisi apa lagi kayanya?

Wife: Apa tu ah? Flora dan fauna??

HP: emmmm... bukan..

Wife: Makanan padas?

HP: jauh-jauh...

Wife: apatah? Mobile 3G? Astro??Reality show??

HP: Ih, lain-lainan jua eh.. adakah astro dibawa-bawa.. atubah budaya timur ani kaya jua dengan budi-bahasanya..

Wife: ah, iatah kan ku jawap tadi tu, sekali abang tia menyampuk.

HP: eleh, eksyen.

Wife: Awu dih.. eksyen ku tah nah.. Napa kan bang kita memikirkan isu budi bahasa ani??

HP: Kaya budi bahasa ani prasan abang makin kurang bah.. Tadi ah, macam-macam jenis urang abang jumpa.. Tu maci joyah disebalah ah, aku menagur ucapnya mengurat.. lapas atu masa di bus stop, orang-orang mudanya inda tau hormatkan urg sekeliling.. Tadi d restaurant, waitress nya kurang ajar.. heyyy... apa kan jadi dunia ani..

Wife: Ada-ada saja abang ani eh.. Aku ani inda pulang pandai bersyarah ni, tapi dangar sini bang, budi bahasa ani umpama tiang rumah, kalau tiang atu rusak atau patah, dapat jua diusai atau diganti kan? Sama jua halnya dengan budi bahasa.

HP: Maksud sayang, masalah budi bahasa ani boleh di’usai’ lah tu?

Wife: (tersenyum) Buleh, bang.. kalau ada usaha.. bukan saja kitani yang berusaha, tapi kalau buleh, setiap golongan masyarakat berusaha!!

HP: (termenung sekajap).. banar jua nyamu atu, mun sudah c ramli sarip atu mau berubah, ertinya urg2 yg kurang budi bahasa atu, bulihlah disadarkan tu, asalkn ada usaha yang mungkin bulih merubah diorang.. hmmm..

Wife: Lurus tu bang nya kita atu..Eh, bang karang jangan lupa ah?

HP: Apa ada?

Wife: Ni memicik jerawat ku ah..

HP: Eh, sayang ani, urang mikirkan pasal budi bahasa ia mikirkan pasal jerawat.. jangan diamalkan.. jerawat ani umpama tiang rumah kana kikis, semakin kau kikis makin rusak!!

Wife: Ihh, ikut-ikutan tia jua becakap pasal tiang rumah. Bah jangantah!!

HP: bah, bah lakastahnah.. agatah sayang masuk dulu.. apa baik pemakaiku kan memicik jerawatnya ani.. apa baik ah... ahaha, ani baru kebalasan (gunting kabun)!!

***

PS: Kalau membaca skrip ganya memang boring hahaha

Read More

We will meet again

Aku sentiasa menanti akan kehadirannya. Dia hanya datang menemuiku setahun sekali. Ketibaannya membawa seribu erti kepadaku. Kegembiraanku sukar diluahkan dengan kata-kata apabila bertemu dengannya.

Dengan kemunculannya, aku belajar erti sabar. Aku belajar erti bersyukur. Aku belajar erti keikhlasan. Aku belajar makna ketabahan. Aku belajar makna kesucian. Dia mengajar aku apa itu taqwa. Dia mengajar aku apa itu kerahmatan. Dan dia mengajar aku apa itu keredhaan.

Pada hari pertama kehadirannya, aku akan menahan lapar dan dahaga bermula dari terbit fajar sadiq hingga matahari terbenam. Menahan lapar dan dahaga bukanlah satu seksaan bagiku, malah, ia merupakan satu nikmat. Satu nikmat yang mempunyai pelbagai keistimewaan. Sebaik sahaja matahari terbenam dan azan maghrib berkumandang, aku dan keluargaku akan berkumpul untuk berbuka. Maka dengan secara tidak langsung, kehadirannya membuatkan hubungan kekeluargaan bertambah erat.

Dengan kehadirannya ini juga, muslimin dan muslimat berlumba-lumba mencari ganjaran sampingan iaitu bersembahyang terawih dan bertedarus pada malam hari.

Pada 10 malam terakhir sebelum dia pergi meninggalkan aku, ada terdapat satu malam yang penuh keistimewaan. Satu malam yang dinamakan malam Lailatul Qadar. Alangkah bertuahnya bagi muslimin dan muslimat yang beribadat pada 10 malam terakhir tersebut.

Dan kini dia telah pergi meninggalkan aku. Aku perlu menanti setahun lagi untuk bertemu dengannya kembali. "Dia" yang kusebutkan ini bernama "Ramadhan". Bulan yang penuh kerahmatan. Sesungguhnya kami, muslimin dan muslimat akan merinduimu setelah kau pergi meninggalkan kami. Kepergiannya digantikan pula dengan kemunculan rakannya yang bernama "Syawal", dimana muslimin dan muslimat menyambut kejayaan mereka setelah berpuasa selama sebulan semasa kehadiran "Ramadhan." Selamat tinggal ku ucapkan kepada Ramadhan dan selamat datang ku ucapkan kepada Syawal. Semoga kamu semua bergembira semasa hari raya ani, dimana saja kamu berada, baik di Brunei atau di negeri luar=)

Read More