Twilight part 1

Hancur. Bucur. Musnah. Pasrah. Pacah. Ngilu. Pilu. Pakai tia apa-apa saja perkataan yang dapat menggambarkan hatiku yang dilanda duka lara ani. Ingin saja ku menghantakkan kepalaku ani ke dinding. Biar pacah berterabur sepertimana pacahnya sebuah tabung babi. Tapi aku inda lah se-emosi dan se-gila babi macamatu. Mun pacah tabung, baik lagi, terkeluar duit. Mun pacah kepala? Tau tah kamu tu apa yang terkeluar. Indatah lagi payah ku jelaskan. Mun kamu inda tau jua, maknanya kamu atu nada kepala.

"Oi Bob, bawa bertenang eh. Dari tadi ku meliat kau ani emosi. Inda baik untuk tenaga batin kalau emosi saja ani,"tiba-tiba rakanku si Lunchai berkata yang muncul antah dari mana. Tapi ia ani andang pandai main silap mata. Maka inda hairanlah kalau ia ani pandai menunjukkan mua secara tiba-tiba.

"Apa bob bob? Bila masa namaku ani si Bob?!"aku menjawab dengan penuh emosi seperti perempuan yang sedang pms.

"Eh, pemarah jua eh. Sorry bah bob.... Eh, salah. Sorry bah Edward Cullen. Nah, puas hati? Full name sudah tu."

"Penyeluru kau ani ah. Tau sudah orang emosi. Hurt ku ni."

"Sudahtah Ed. Se-emosi mana pun kau, inda jua hidup balik si Bella Swan atu. Lupakan tia. Banyak lagi bah Bella diluar atu. Bukannya Swan saja. Ada Bella Crow, Bella Duck, Bella Hen, Bella Owl, Bella Dodo, Bella..."

Waw, "Cali" ia ani. Ia ani tah banar. Minta kana tampar. Belum pun terkana penampar tahap maharajaku, si Lunchai sempat menghilangkan diri. Pakal saja ia ani magician. Mun inda, berbelah dua puluh sudah pipinya ni terkana penampar mautku. Penyeluru banar ia atu. Membuat lawak jenaka inda mengana dengan tempatnya.

Oh, Bella Swan. Why? Mengapa? Kenapa? Ngapain? Aku masih inda dapat menerima kematian mu. Bedebah banar orang yang membunuh kau atu. Kalau ku tau siapa, habis ku cincang segala usus-ususnya.

Aku bana bana kan kau Bella Swan. I love you. Hutangmu 50 sen atu alum sempat kau bayar balik. Inda apalah, aku halalkan saja. Kalau ku inda halalkan, aku takut kau jadi kuntilanak.

Disaat-saat ku berdukacita ani, teringatlah ku kembali memori-memori sandiwara bersamanya. Memang indah. Memang manis. Sepertimana manisnya kek tapak kuda. Atau Kek Roll. Atau mana-mana kuih kegemaran kamu. Yang penting manis. Tapi jangan pilih kuey tiao. Walaupun pronounciation macam kuih, jangan silap. Ia inda dikira sebagai kuih pasalnya ianya adalah sejenis mee, atau noodle dalam bahasa orang putihnya. Bukan poodle tetapi noodle. Kalau poodle, anjing tia.

Pertama kali ku bertemu dengan si Bella adalah pada setahun yang lalu. Sebelum berjumpa si Bella, aku masih single. Inda pernah ada girlfriend. Aku mempunyai ramai kawan bini-bini. Yang ku suka pun ramai. Masalahnya, aku ani inda pandai meluahkan perasaan. Maka aku pun hidup sebagai seorang full time single laddie (bukan lady).

Tapi semuanya berubah setelah pertemuanku dengan si Bella. Ia cemani tu ceritanya. Masa atu... Tunggu. Cemana tu ah... Di jamban atau di belakang trak sampah tu ah? Mana satu tu banar... Tapi macam di dalam hotel jua. Ok, yang sebenarnya kan...Aku inda ingat macamana boleh kami ani berjumpa dan jadi couple. Kan bercerita tah ku tadi ni. Lupa ku sudah cemana.

"Bang Edward! Bang Edward!!"tiba-tiba ada orang menjerit arahku. Pikir si Lunchai tadi, rupanya si Binjai.

"Mengapa kau awang Binjai? Kana bubut samut padas kau?"ujarku kemusykilan.

"Inda, bukan pasal samut padas. Ada berita tergempar! Panas! Panas! Masih segar dari microwave oven! Masih berwap-wap!"

"Berita panas?! Apa beritanya?"

"Pasal si Bella.Anu..Ada orang tau siapa sudah pembunuhnya."

"Siapa pembunuhnya?! BAGITAU AKU!!"

Bersambung...

Read More

Pria Terhebat part 2

Setelah menumpaskan Pendekar Kirai Tabal yang kini sudah inda bekirai lagi, aku pun meneruskan perjalananku menuju ke kedai si Ah Chong untuk membeli gula. Sepanjang perjalananku atu, aku menyanyi lagu "Sua Sue Kemoning" untuk menghiburkan hati ku yang keboringan. Al-maklumlah, di zaman ku ani mana ada Ipod Touch. Jangankan Ipod touch, Ipod mini pun nada. Jangankan Ipod mini, Sony Walkman pun alum lagi kana cipta.

Namun nyanyian ku tergendala apabila aku ternampak ada seorang nenek tua berjalan di hadapanku. Bukan saja nyanyian, malah perjalananku pun tergendala ulihnya. Mana inda, berjalan atu macam siput. Barangkali siput pulang kali lagi laju dari kedia. Oleh kerana inda tahan, tanpa sontan-santun aku pun memotong saja nenek tua atu. Mun menunggu kedia, awu, tumbuh taie mata ulihnya.

"Hoi, orang muda,"tiba-tiba nenek tua atu bersuara. "Memotong atu cubatah cakap excuse me dulu!"sambungnya lagi.

Aku pun mengantuti nenek tua atu tanpa rasa bersalah.

"Tu nah excuse me kita maci!"jawapku sambil memberikan senyuman sinis.

"Cis, ani sudah labih ni!"gertak nenek tua atu yang kini sedang melipat kedua-dua lengan baju kurungnya yang bercorakkan Hello Kitty.

Nampaknya satu pergaduhan besar akan berlaku lagi. Memang di zaman ku ani, orang-orangnya suka berkelaie. Salah sikit, berkelaie. Apatah lagi mun salah basar.

Tiba-tiba nenek tua atu lompat ke udara tanpa pengetahuanku. Wow, tua-tuanya pun masih baik ujudnya. Tapi yang calinya ia berjalan perlahannya kalah siput. Sekalinya melumpat, kalah kangaroo. Cemana kan tu. Dalam segi biologi & physics, inda pulang berapa munasabah tu. Cahaya matahari yang silau membuatkan aku payah untuk melihat kemana arah lumpatnya nenek tua atu.

"Buk!"sound effect semasa aku jatuh meniarap ke tanah. Cis, kana terajang dari belakang rupanya. Samseng orang tuanya ani.

"Prak!"sound effect apa lagi ni? Oh rupanya, bunyi tulang nenek tua atu. Patah kali jangan-jangan.

"Wang, tulung ku wang! Patah usulnya tulang belakang ku ani!"nenek tua atu memanggilku.

"Yatah kita atu. Tau sudah tua kan mampus, masih jua samseng-samsengnya kan berkelaie. Nah kita nah!"balasku dengan lagak seorang samseng taie kambing.

"Cis, kurang ajar punya orang muda! Nasib saja kesihatan ku ani inda mengizinkan, mun inda abis gigi-gigi mu atu berterabur!"

Aku meninggalkan nenek tua atu sambil ketawa-ketawa berdahak-dahak, meneruskan perjalananku ke kedai si Ah Chong. Harap-harap lapas ani nada lagi sebarang halangan. Seperti biasa aku menyambung kembali lagu "Sua Sue Kemoning" yang ku nyanyikan tadi.

Antah sudah berapa kali ku menyanyi lagu "Sua Sue Kemoning" atu secara berulang-ulang, akhirnya sampai jua ku ke destinasi tanpa sebarang gangguan. Aku pun memanggil si Ah Chong untuk mengambilkan gula yang ingin ku bali. Selang beberapa minit kemudian, si Ah Chong pun keluar dengan membawa sebungkus gula. Sebelum memberi usin arahnya, aku memeriksa dulu isinya.

"Oi, Ah Chong ani gula cap Kajah Banun ni. Aku mana mau ani! Aku mau gula cap Dang Gaga!"ujarku yang inda puas hati.

"Haiya itu macam pun lu mau komplen ka? Itu gula sama saja. Sudah hujung-hujung pun keluar jadi taie,"balas si Ah Chong.

"Tukar eh! Aku masih jua mau gula cap Dang Gaga atu!"

"Kalau wa inda mau tukar? Apa lu mau buat?"

"Artinya mencari nahas lah kau tu."

Aku pun menyucuk kedua lubang hidung si Ah Chong dan menghumbannya ke udara. Sementara menunggu ia mendarat, aku pun menyimbat seguni gula cap Dang Gaga yang tersimpan di dalam kadainya. Lapas ku mengampaikan usinku, aku pun balik. Untuk menghiburkan hatiku, aku menyanyi lagu "Oi Pak Saloi". Usulnya reputasi ku sebagai seorang pendekar, alum lagi tergugat. Semua pencabarku hari ani ku kalahkan dengan kacang-sekacangnya.

Setelah 5 batu berjalan, akhirnya aku pun sampai ke rumahku. Ku liat babuku sedang menyapu-nyapu di luar rumah. Aku pun mengaga ke arahnya.

"Nah, bu. Gula cap Dang Gaga yang kita pasani tadi ah,"ujarku ke arah babuku tanpa membagi salam. Atu tekajut ia, sampai terbang penyapu lidinya.

"Ih, tekajut ku kau ani eh. Balik kau sudah rupanya,"balasnya.

Aku pun mengunjuk seguni gula cap Dang Gaga atu ke arah babuku dan ia pun memeriksanya.

"Gula jua ni?!"kata babuku. Muanya kini berubah jadi masam. Oh, tidak. Usulnya satu perkara buruk akan berlaku.

"Awu gula. Kita jua bepasan tadi! Gula kan nya kita?"jawapku dengan tenang walaupun yang sebenarnya aku panik.

"Prak!"sound effect yang antah datang dari mana. Oh rupanya tulang kakiku patah bagas kana hambat dengan penyapu lidi babuku. Aku pun tersungkur ketanah sambil meraung kesakitan.

"Aku atu bepasan SIRA, yang kau balikan aku gula, mengapa?!!"jerit babuku sambil melibas-libas penyapu lidinya arah kakiku.

"Ampun bu, ampun! Pendangaranku tadi gula! Ampun!"aku meminta belas kasihan.

"Ada anak, tapi inda dapat diharap! Aku jua yang mesti membuat segala-galanya di rumah ani!"

Sungguhpun aku seorang pendekar yang hebat, babuku atu tah ganya satu-satunya yang inda pernah ku kalahkan. Inda baik melawan indung! Bedusa!

The End

Read More

80 percent progress

Sneak peak for my Maya Project. 80 % progress. Tapi ani bukan yang kan dihantar. The real thing is just 5 seconds duration. This 35 seconds video aku buat saja-saja.

Read More

Rejuvenated

Fuh. Lapas sebulan blog ani berhabuk dan beruras, akhirnya berseri jua kembali Boredom Bin ani. Title untuk cerita terbaru ani namanya "Pria Terhebat". Pasal apa cerita ani? Bacalah sendiri. Apa gunanya kamu belajar ABC 123 masa kindergarten kalau inda mau membaca. Insya-Allah sambungannya ada tu nanti. Tunggu saja.

Sebulan aku menghilang atu bukannya apa. Sibuk dengan assignments. Hectic. Terutamanya, course 3d modelling ku. Every Wednesday ada 6 hours of 3d workshop. 3 hours pagi & 3 hours patang. 1 hour break in between. Makan ruti paun saja waktu break atu. Kadang-kadang ruti paun atu bebali di kadai, mun lupa membawa dari rumah.

So apatah yang ku buat untuk 3d modelling ku ani? Maybe kamu pernah liat screenshots yang pernah ku tunjukkan dalam blog ani, titlenya "Maya oh Maya". Atu baru 5% tu. Sudahnya 100% nanti, mesti macam scene dalam game Warcraft. Liat gambar di bawah.

No, gambar yang di atas atu bukan aku yang buat. For example saja. Jangan kamu saspens eh. Cematu lah karang tu usulnya end product keraja ku. Well, harap-harap lah. Aku ani baru jua belajar kan menggunakan. Masa ani progressku baru 40 %. Deadlinenya in 3 weeks. Dapat kah inda siap tu? Insya-Allah dapat. Tapi terpaksa kurangkan main FIFA ni. Kacau eh.

Before ku mengundur diri, maritah aku menunjukkan apa yang ku buat untuk 3d modelling ku ani. Inda pulang seberapa ni aku punya modelling ani. Buat yang terbaik saja.

Starting dari cube.

Sudah ku baca mantera semerah padi, jadi cemani tia. Magic.

Lapas ku jampi lagi banyak-banyak, jadi cemani tia.

buildings and props.

20% progress

30% progress. Lapas bagi proper lightings and shadows.

40% progress. Ada foggy effect.

And finally...
100% progress. hebat kan? haha I wish! Screenshot dari FF13 ni. Aku curi dari website orang.

Mengantuk ku eh. Bah, tunggu saja sambungan cerita "Pria Terhebat". Ada tu nanti.

Read More